AKP ភ្នំពេញ ថ្ងៃទី២៤ ខែកុម្ភៈ ឆ្នាំ២០២៥ -- នាយករដ្ឋមន្ត្រីសិង្ហបុរី លោកឡរេន វង់ (Lawrence Wong) និងជាអគ្គលេខាធិការនៃគណបក្សសកម្មភាពប្រជាជន (PAP) បានជួបជាមួយលោក យីន លី (Yin Li)សមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន (CPC)។

លោក យីន ​ជា​លេខា​គណៈកម្មាធិការ​ក្រុង​ប៉េកាំងនៃបក្ស CPC បាន​កត់​សម្គាល់​ថា ឆ្នាំ​នេះ​ជា​ខួប​លើក​ទី៣៥ នៃ​ការ​បង្កើត​ទំនាក់ទំនង​ការទូត​រវាងប្រទេស​ចិន និង​សិង្ហបុរី។

លោកបាននិយាយថា ប្រទេសចិនត្រៀមខ្លួនជាស្រេចក្នុងការពង្រឹងការផ្លាស់ប្តូរកម្រិតកំពូលជាមួយប្រទេសសិង្ហបុរី ធ្វើឱ្យស៊ីជម្រៅនូវការរួមបញ្ចូលគ្នានៃយុទ្ធសាស្ត្រអភិវឌ្ឍន៍ ពង្រីកកិច្ចសហប្រតិបត្តិការជាក់ស្តែងក្នុងវិស័យផ្សេងៗ និងលើកកម្ពស់ការផ្លាស់ប្តូរអន្តរភាគីតាមស្ថាប័ន ព្រមទាំងការរៀនសូត្រគ្នាទៅវិញទៅមកលើអភិបាលកិច្ច។

លោកបានបន្ថែមថា ទីក្រុងប៉េកាំងនឹងអនុវត្តន៍យ៉ាងសកម្មនូវការឯកភាពដ៏សំខាន់ដែលមេដឹកនាំនៃប្រទេសទាំងពីរសម្រេចបាន បន្តជំរុញវិស័យថ្មីនៃកិច្ចសហប្រតិបត្តិការជាមួយប្រទេសសិង្ហបុរី និងជំរុញការផ្លាស់ប្តូរវប្បធម៌ និងប្រជាជន។

លោក វង់ បាននិយាយថា ប្រទេសសិង្ហបុរីវាយតម្លៃខ្ពស់ចំពោះទំនាក់ទំនងមិត្តភាពជាមួយប្រទេសចិន ហើយមានឆន្ទៈក្នុងការប្រារព្ធខួបលើកទី៣៥ នៃទំនាក់ទំនងការទូត ដើម្បីពង្រឹងការផ្លាស់ប្តូរ និងកិច្ចសហប្រតិបត្តិការជាមួយប្រទេសចិនលើគ្រប់វិស័យ ពង្រឹងកិច្ចសន្ទនា និងការផ្លាស់ប្តូររវាងបក្សកាន់អំណាចនៃប្រទេសទាំងពីរ និងពង្រីកកិច្ចសហប្រតិបត្តិការជាមួយទីក្រុងប៉េកាំងលើវិស័យដូចជា វប្បធម៌ អប់រំការថែទាំសុខភាព និងការច្នៃប្រឌិត ដើម្បីរួមគ្នាជំរុញទំនាក់ទំនងសិង្ហបុរី-ចិនឱ្យឈានដល់កម្រិតថ្មីមួយ។

តបតាមការអញ្ជើញរបស់រដ្ឋាភិបាលសិង្ហបុរី លោក យីន បានដឹកនាំគណៈប្រតិភូបក្ស CPC ទៅបំពេញទស្សនកិច្ចនៅប្រទេសសិង្ហបុរី។ ក្នុង​ដំណើរ​ទស្សនកិច្ច​នេះ លោក​ក៏​បាន​ជួប​ឧបនាយក​រដ្ឋមន្ត្រី និង​ជា​ប្រធានគណបក្ស PAP លោក ហេង ស្វីកៀត (Heng Swee Keat) ឧបនាយករដ្ឋមន្ត្រី លោក ហ្គាន់ គីមយ៉ុង (Gan Kim Yong) រដ្ឋមន្ត្រី​ក្រសួងការបរទេស លោក វីវ៉ាន់ បាឡាគ្រីសហ៍ណាន់ (Vivian Balakrishnan)និង​រដ្ឋមន្ត្រី​ក្រសួងសុខាភិបាល លោក អ៊ុង យេគុង (Ong Ye Kung) ៕

ដោយ៖ មូល មិនា (ប្រភព៖ ភីបផលដេលី)