AKP ភ្នំពេញ ថ្ងៃទី២៤ ខែកុម្ភៈ ឆ្នាំ២០២៥ -- រដ្ឋមន្ត្រីការបរទេសចិន លោកវ៉ាង យី (Wang Yi) បានជួបជាមួយរដ្ឋមន្ត្រីការបរទេសឥណ្ឌា លោក ស៊ូប្រាហ៍ម៉ាន់យ៉ាម ចៃសានការ (Subrahmanyam Jaishankar) ដើម្បីពិភាក្សាអំពីទំនាក់ទំនងទ្វេភាគីនៅខាងក្រៅកិច្ចប្រជុំរដ្ឋមន្ត្រីការបរទេសនៃក្រុមប្រទេស G20 នៅទីក្រុងចូហាន់ណេសប៊ឺហ្គ ប្រទេសអាហ្វ្រិកខាងត្បូង។

លោក វ៉ាង ជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន បានរំលឹកពីជំនួបដ៏ជោគជ័យរវាងប្រធានាធិបតីចិន លោក ស៊ី ជីនពីង (Xi Jinping) និងនាយករដ្ឋមន្ត្រីឥណ្ឌាលោក ណារេនដ្រា ម៉ូឌី (Narendra Modi) នៅទីក្រុងកាហ្សាន ប្រទេសរុស្ស៊ីកាលពីឆ្នាំមុន ដែលបានកំណត់ទិសដៅទូទៅសម្រាប់ការកែលម្អ និងអភិវឌ្ឍន៍ទំនាក់ទំនងទ្វេភាគី។ ក្នុងជំនួបនោះ ភាគីទាំងពីរបានឯកភាពថាប្រទេសចិន និងឥណ្ឌា ក្នុងនាមជាប្រទេសដែលមានអរិយធម៌បុរាណទាំងពីរនិងជាប្រទេសជិតខាងគួរតែជឿជាក់ គាំទ្រ និងជួយគ្នាទៅវិញទៅមក។

លោក​បាន​កត់​សម្គាល់​ថា ការ​ស្តារ​ទំនុក​ចិត្ត​គ្នា​ទៅ​វិញ​ទៅ​មក និង​ការ​សម្រេច​បាន​កិច្ច​សហប្រតិបត្តិការ​ឈ្នះ​ឈ្នះស្រប​តាម​ការ​រំពឹង​ទុក​រួម​របស់​ប្រជាជន​ទាំង​ពីរ។ ភាគីទាំងពីរគួរតែប្រកាន់ខ្ជាប់ជាមូលដ្ឋាននូវមតិឯកភាពដែលមេដឹកនាំរបស់ពួកគេសម្រេចបាន ហើយធានាថាទំនាក់ទំនងទ្វេភាគីនៅតែដើរលើផ្លូវត្រូវ។

លោក វ៉ាង បានបន្ថែមថា ប្រទេសចិនបានត្រៀមខ្លួនរួចជាស្រេចដើម្បីធ្វើការជាមួយប្រទេសឥណ្ឌា ដើម្បីរៀបចំផែនការសកម្មភាពរំលឹកខួបលើកទី៧៥ នៃការបង្កើតទំនាក់ទំនងការទូតរវាងប្រទេសទាំងពីរ។

ដោយឡែកលោក ចៃសានការ បាននិយាយថា កិច្ចប្រជុំនៅទីក្រុងកាហ្សាន រវាងលោក ម៉ូឌី និងលោក ស៊ី បានផ្តល់ការណែនាំដ៏សំខាន់សម្រាប់ធ្វើឱ្យប្រសើរឡើងនៃទំនាក់ទំនងទ្វេភាគីរវាងប្រទេសឥណ្ឌា និងចិន ដែលនាំទៅដល់ការផ្លាស់ប្តូរទ្វេភាគីក្នុងវិស័យផ្សេងៗ និងទទួលបានលទ្ធផលគួរឱ្យកត់សម្គាល់។

ដោយកត់សម្គាល់ថា ការបង្កើតទំនុកចិត្តទៅវិញទៅមករវាងប្រទេសឥណ្ឌា និងចិន បានបម្រើផលប្រយោជន៍របស់ភាគីទាំងពីរ លោក ចៃសានការ បាននិយាយថា ប្រទេសឥណ្ឌាពេញចិត្តចំពោះសមិទ្ធិផលដែលទទួលបានក្នុងការធ្វើឱ្យប្រសើរឡើងនូវទំនាក់ទំនងទ្វេភាគី ហើយត្រៀមខ្លួនជាស្រេចដើម្បីធ្វើការជាមួយប្រទេសចិន ដើម្បីពន្លឿនការស្តារឡើងវិញនូវកិច្ចសហប្រតិបត្តិការ លើកកម្ពស់ការផ្លាស់ប្តូរប្រជាជន និងប្រជាជនសម្រួលការធ្វើដំណើរឆ្លងកាត់ព្រំដែន និងរួមគ្នាការពារសន្តិភាព និងស្ថិរភាពនៅតាមតំបន់៕

ដោយ៖ មូល មិនា (ប្រភព៖ ភីបផលដេលី)