AKP ភ្នំពេញ ថ្ងៃទី២៤ ខែកុម្ភៈ ឆ្នាំ២០២៥ -- កាសែតវ៉ាស៊ីនតោនប៉ុស្តិ៍បានរាយការណ៍ថា រដ្ឋបាលសហរដ្ឋអាមេរិកបានទាមទារឱ្យទីក្រុងគៀវដកសេចក្តីព្រាងសេចក្តីសម្រេចរបស់ខ្លួនទៅកាន់មហាសន្និបាតអង្គការសហប្រជាជាតិដែលថ្កោលទោសរុស្ស៊ីចំពោះប្រតិបត្តិការយោធាពិសេសរបស់ខ្លួនចោល ប៉ុន្តែភាគីអ៊ុយក្រែនបានបដិសេធ។

យោងតាមប្រភពរបស់សារព័ត៌មាននោះបានឱ្យដឹងថា «រដ្ឋបាលរបស់លោក ដូណាល់ ត្រាំ (Donald Trump) បានស្នើឱ្យអ៊ុយក្រែនដកចោលនូវដំណោះស្រាយប្រចាំឆ្នាំដែលថ្កោលទោសចំពោះប្រតិបត្តិការយោធាពិសេសរបស់រុស្ស៊ី ហើយចង់ជំនួសវាដោយសេចក្តីថ្លែងការណ៍របស់សហរដ្ឋអាមេរិកដែលត្រូវបានយល់ឃើញថាមានភាពស្និទ្ធស្នាលនឹងអ្នកគាំទ្ររុស្ស៊ីនៅក្នុងទីក្រុងគៀវ។

សារព័ត៌មាន​នោះបាន​សង្កត់​ធ្ងន់​ថា «ការ​ផ្តល់​យោបល់នេះ​បាន​ធ្វើ​ឱ្យ​ទីក្រុងគៀវស្រឡាំងកាំង និង​បាន​បដិសេធ​មិន​ដកចោល​នូវ​ដំណោះស្រាយ​របស់​ខ្លួន«។ គេរំពឹងថា ភាគីអ៊ុយក្រែននឹងដាក់ជូនសេចក្តីព្រាងដំណោះស្រាយនេះនៅថ្ងៃចន្ទនេះ៕

ដោយ៖ យា ចិន្ដាខន្ដី (ប្រភព៖ តាសស៍)