AKP ភ្នំពេញ ថ្ងៃទី២៤ ខែកុម្ភៈ ឆ្នាំ២០២៥-- នៅអាកាសយានដ្ឋានអន្តរជាតិភ្នំពេញ ឯកឧត្តម ឧត្តមសេនីយ៍ទោ សែម រតនា អនុប្រធានទី១គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព បានអញ្ជើញជាអធិបតីនៃពិធីទទួលស្វាគមន៍កងអនុសេនាធំកម្ទេចគ្រាប់មិនទាន់ផ្ទុះលេខ៩៨ ទី២ បានធ្វើមាតុភូមិនិវត្តន៍វិញក្រោយបញ្ចប់បេសកកម្មអង្គការសហប្រជាជាតិរយៈពេល១ឆ្នាំនៅសាធារណរដ្ឋអាហ្វ្រិកកណ្តាល កាលពីថ្ងៃទី២៣ ខែកុម្ភៈ ឆ្នាំ២០២៥។

ក្នុងពិធីនេះ ឯកឧត្តមអគ្គនាយកស្តីទីបាននាំមកនូវការផ្តាំផ្ញើសួរសុខទុក្ខពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ឯកឧត្តម ឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិ និងឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ។

ឯកឧត្តម សែម រតនា បានថ្លែងថា កងកម្លាំងដែលបានធ្វើមាតុភូមិនិវត្តន៍វិញនៅថ្ងៃនេះ  គឺបានបញ្ចប់បេសកកម្មរបស់ខ្លួន និងទទួលបានផ្លែផ្កាជាច្រើន និងជោគជ័យគ្រប់ភារកិច្ចដែលទីបញ្ជាការដ្ឋានអង្គការសហប្រជាជាតិប្រចាំអាហ្វ្រិកកណ្តាលដាក់ជូន គឺកម្លាំងយើងបានបំពេញការងារ នៅតំបន់បេសកកម្ម គឺចុះទៅកម្ទេចគ្រាប់ បោសសម្អាតគ្រឿងផ្ទុះ និងធ្វើការងារមនុស្សធម៌ជាច្រើនផងដែរ ដូចជាជួសជុល និងសាងសង់ស្ពាន និងចុះចែកសម្ភារសិក្សាដល់សិស្សានុសិស្សផងដែរ៕

ដោយ សំ សាម៉ន