AKP ភ្នំពេញ ថ្ងៃទី២៣ ឆ្នាំ២០២៥--
ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានដឹកនាំក្រុមការងារពាក់ព័ន្ធ អនុវត្តសាកល្បង និងផ្តល់ការណែនាំលើការធ្វើវេទិកាពិភាក្សា និងការធ្វើបទបង្ហាញ ត្រៀមសម្រាប់សន្និបាតអប់រំឆ្នាំ២០២៥ ដោយមានការចូលរួមពីសំណាក់ ឯកឧត្តម លោកជំទាវថ្នាក់ដឹកនាំក្រសួងអប់រំ យុវជន និងកីឡា និងមន្ត្រីពាក់ព័ន្ធក្រោមឱវាទ។
សន្និបាតបូកសរុបការងារអប់រំ យុវជន និងកីឡាឆ្នាំសិក្សា ២០២៣-២០២៤ និងទិសដៅសម្រាប់ឆ្នាំសិក្សា២០២៤- ២០២៥” គឺជាព្រឹត្តិការណ៍ប្រចាំឆ្នាំដ៏មានសារៈសំខាន់មួយក្នុងវិស័យអប់រំ នឹងមានការអញ្ជើញចូលរួមពីសំណាក់ ឯកឧត្តម លោកជំទាវថ្នាក់ដឹកនាំក្រសួងអប់រំ យុវជន និងកីឡា ដៃគូអភិវឌ្ឍមកពីគ្រប់មជ្ឈដ្ឋាន បុគ្គលិកអប់រំគ្រប់លំដាប់ថ្នាក់មកពី ២៥ រាជធានី-ខេត្ត ត្រូវបានរៀបចំឡើងដើម្បីពិនិត្យឡើងវិញរួមគ្នាប្រកបដោយភាពគ្រប់ជ្រុងជ្រោយអំពីវឌ្ឍនភាពរបស់វិស័យអប់រំ យុវជន និងកីឡា ដែលសម្រេចបានក្នុងឆ្នាំកន្លងទៅ ក៏ដូចជាលើកទិសដៅការងារសម្រាប់ឆ្នាំបន្ទាប់ និងជាឱកាសមួយសម្រាប់ឆ្លុះបញ្ចាំងអំពីការចូលរួមរបស់ក្រសួងអប់រំ យុវជន និងកីឡាក្នុងការអនុវត្តយុទ្ធសាស្ត្រ បញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា នីតិកាលទី៧នៃរដ្ឋសភា។ 

កិច្ចប្រជុំ នាព្រឹកថ្ងៃទី២៣ ខែកុម្ភៈ ឆ្នាំ២០២៥ នៅវិទ្យាស្ថានជាតិអប់រំ របៀបវារៈសំខាន់ៗ នៃសន្និបាតអប់រំឆ្នាំ២០២៥ នេះរួមមាន ៖ 
- របាយការណ៍ស្តីពីលទ្ធផលការងារអប់រំ យុវជន និងកីឡាឆ្នាំសិក្សា២០២៣ - ២០២៤
- ការធ្វើបទបង្ហាញស្តីពី សាលារៀនឌីជីថលកម្ពុជា និងការប្រកាសដាក់ឱ្យអនុវត្តសាលារៀនឌីជីថលកម្ពុជា
- វេទិការពិភាក្សាទី១៖ ស្តីពី អភិបាលកិច្ចអប់រំ និងការអនុវត្តស្តង់ដាសាលារៀនគំរូ, 
- វេទិកាពិភាក្សា ទី២៖ ស្តីពី ការកែទម្រង់សាលារៀន, បទបង្ហាញស្តីពី ការចូលរួមរបស់សហគមន៍ក្នុងការអប់រំកុមារតូច ការអនុវត្តកញ្ចប់អំណាន និងគណិតវិទ្យាថា្នក់ដំបូង ដើម្បីកសាងមូលដ្ឋានគ្រឹះដល់សិស្ស, បទបង្ហាញស្តីពី នវានុវត្តន៍នៃការអនុវត្តស្តង់ដារៀនគំរូ និង បទបង្ហាញស្តីពី កំណែទម្រង់ការគ្រប់គ្រងធនធានមនុស្ស (គ្រូបង្រៀន) 

- វេទិកាពិភាក្សា ទី៣៖ បរិវត្តកម្មអប់រំឧត្តមសិក្សា រួមមានបទបង្ហាញស្តីពី កំណែទម្រង់គ្រឹះស្ថានឧត្តមសិក្សា, ការលើកកម្ពស់ការអប់រំវិទ្យាសាស្ត្រ បច្ចេកវិទ្យា ការស្រាវជ្រាវ ការអភិវឌ្ឍ និងនវានុវត្តន៍ឆ្ពោះទៅសម្រេចបានយុទ្ធសាស្ត្របញ្ចកោណដំណាក់កាលទី១, ការតម្រង់ទិសឧត្តមសិក្សាឆ្លើយតបទៅនឹងតម្រូវការទីផ្សារការងារ
- វេទិកាពិភាក្សា ទី៤៖ បរិយាកាសល្អសម្រាប់ការសិក្សាពេញមួយជីវិត ដែលរួមមានបទបង្ហាញ ស្តីពី បរិវត្តកម្មអប់រំជនពេញវ័យ, ការអភិវឌ្ឍមូលធនយុវជនតាមរយៈការអនុវត្តសកម្មភាពអាទិភាពនៃអគ្គនាយកដ្ឋានយុវជន, ការរុញចលនាយុវជនម្នាក់ចេះកីឡាមួយប្រភេទយ៉ាងតិចប្រចាំជីវិត, ការអនុវត្តគោលនយោបាយស្តីពី សុខភាពសិក្សាអាហារូបត្ថម្ភ ចំណីអាហារតាមសាលារៀន៖ ឧត្តមានុវត្តន៍ និងបញ្ហាប្រឈម។
គួរបញ្ជាក់ដែរថា សន្និបាតអប់រំប្រចាំឆ្នាំនេះ មានរយៈពេល ៣ថ្ងៃ ចាប់ពីថ្ងៃទី២៤ ដល់ថ្ងៃទី២៦ ខែកុម្ភៈ ឆ្នាំ២០២៥ ខាងមុខនេះ ដែលនឹងមានការផ្សាយបន្តផ្ទាល់លើបណ្ដាញសង្គមផ្លូវការរបស់ក្រសួងអប់រំ យុវជន និងកីឡាផងដែរ៕ដោយ៖ ប៊ុនរិទ្ធ