AKP កំពង់ឆ្នាំង ថ្ងៃទី២២ ខែកុម្ភៈ ឆ្នាំ២០២៥-- ឯកឧត្តម ស៊ុន សុវណ្ណារិទ្ធិ អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តកំពង់ឆ្នាំង បានជំរុញឱ្យមន្រ្តីជំនាញសហការជាមួយអាជ្ញាធរមូលដ្ឋានបន្តបង្កើនការផ្សព្វផ្សាយច្បាប់ស្តីពីវិធានការ ការពារ ទប់ស្កាត់ នេសាទខុសច្បាប់ និងគ្រប់គ្រងតំបន់បឹងទន្លេសាបដល់ប្រជាពលរដ្ឋយល់ច្បាស់ ទើបអាចចូលរួមបង្ការ និងទប់ស្កាត់បទល្មើសនេសាទ នៅថ្ងៃទី២១ ខែកុម្ភៈ ឆ្នាំ២០២៥ ដោយមានការអញ្ជើញចូលរួមពីលោក លោកស្រី អភិបាលរងខេត្ត ប្រធានមន្ទីរអង្គភាពជុំវិញខេត្ត កងកម្លាំងប្រដាប់អាវុធទាំង៣ប្រភេទ ក្រុមការងារ អជ្ញាធរទន្លេសាប អភិបាលក្រុង-ស្រុក និងមេឃុំ-ចៅសង្កាត់ ផងដែរ។

ក្នុងឱកាសនោះ ឯកឧត្តម ស៊ុន សុវណ្ណារិទ្ធិ បានមានប្រសាសន៍ថា គោលនយោបាយយុទ្ធសាស្រ្តរបស់ប្រមុខរាជរដ្ឋាភិបាលកម្ពុជា ជាគន្លឹះដើម្បីឆ្លើយតប និងដោះស្រាយបញ្ហាប្រឈមផ្សេងៗ ជាពិសេសជំរុញដល់សេដ្ឋកិច្ចជាតិឱ្យមានការរីចម្រើនលើគ្រប់វិស័យ។ ក្រៅពីកិច្ចអភិវឌ្ឍន៍ខេត្ត ដែលមានលក្ខណៈស្មុគស្មាញមួយចំនួន ដែលគណៈបញ្ជាការត្រូវបន្តពង្រឹងការដោះស្រាយប្រកបដោយស្មារតីទទួលខុសត្រូវខ្ពស់ម៉ឺងម៉ាត់ ប្រសិទ្ធភាព និរន្តរភាព និងសុខសន្តិភាព។ រដ្ឋបាលខេត្ត កងកម្លាំងសមត្ថកិច្ច មន្ទីរ-អង្គភាពពាក់ព័ន្ធ និងអាជ្ញាធរមូលដ្ឋាន ត្រូវអនុវត្ត និងចាត់វិធានការមួយចំនួន បន្ទាប់ពីមានបទបញ្ជាយ៉ាងម៉ឺងម៉ាត់ពីសម្តេចធិបតីប្រមុខរាជរដ្ឋាភិបាល ក្នុងការបង្ក្រាបទល្មើសជលផលនេសាទខុសច្បាប់ អាជ្ញាធរគ្រប់គ្រងតំបន់បឹងទន្លេសាប ដែលយើងទាំងអស់ត្រូវរួមគ្នាអភិរក្សការពារឱ្យបានល្អប្រសើរ។

ទន្ទឹមនឹងនោះ ឯកឧត្តមបានបន្តថា សមត្ថកិច្ចពាក់ព័ន្ធគួរតែត្រូវគិតពិចារណាពីទស្សនវិស័យនៃសមត្ថភាពដែលអាចចិញ្ចឹមជីវិតមនុស្សរបស់អាងទឹកបឹងទន្លេសាប ក្នុងការភ្ជាប់ទំនាក់ទំនងទៅនឹងទស្សនវិស័យនេះ គម្រោងគ្រប់គ្រងបរិស្ថានបឹងទន្លេសាប មានគោលបំណងសំដៅបង្កើតនូវប្រព័ន្ធទាំងឡាយ និងអភិវឌ្ឍន៍សមត្ថភាពសម្រាប់ការសម្របសម្រួលគ្រប់គ្រងធនធានធម្មជាតិ និងការធ្វើផែនការ ការគ្រប់គ្រងធនធានធម្មជាតិដោយមានការចូលរួមពីសហគមន៍ និងការអភិរក្សជីវចម្រុះក្នុងដែនការពារជីវចម្រុះ។ បើសិនជាគ្មានការគ្រប់គ្រងអភិវឌ្ឍ និងអភិរក្សបែបនេះទេនោះ បឹងទន្លេសាបនឹងក្លាយទៅជាតំបន់ដែលមានផលិតផលទាបទៅៗជាលំដាប់។

ជាមួយគ្នានេះដែរ ឯកឧត្តមបានបញ្ជាក់ទៀតថា ការចុះអនុវត្តការងារតាមតំបន់ជាក់ស្តែង ការទទួលបានការយល់ដឹងពីសកម្មភាព និងការងារស្នូលរបស់អាជ្ញាធរដែនដី ក្នុងការចូលរួមអនុវត្តទប់ស្កាត់ និងការការពារតំបន់ព្រៃលិចទឹក ធនធានជលផល ជីវៈចម្រុះ និងប្រព័ន្ធអេកូឡូស៊ី ក្នុងដែនសមត្ថកិច្ច។ ជំរុញឱ្យក្រុមការងារថែទាំ និងមន្ទីរកសិកម្ម រុក្ខាប្រមាញ់ និងនេសាទ ត្រូវសហការជាមួយរដ្ឋបាលស្រុក ត្រួតពិនិត្យតាមដានលើការខូចខាត និងដាំដុះឡើងវិញ រួមទាំងរក្សាពូជដែលនៅសល់ដូចជាឫស្សីស្រុក ឫស្សីពីងពង់ ឫស្សីផ្អែម ដើមរាំងទឹក រំដេញ និងដើមសន្តាន់ ធ្វើការផ្សព្វផ្សាយដល់ប្រជាពលរដ្ឋនៅក្នុងមូលដ្ឋានជាក់ស្តែង ឱ្យជួយថែទាំរហូតដល់មានការលូតលាស់ល្អ សំណូមពរប្រជាពលរដ្ឋចូលរួមសហការទប់ស្កាត់បទល្មើសជលផល តាមរយៈមូលដ្ឋាននេសាទក្នុងភូមិសាស្ត្រខេត្តកំពង់ឆ្នាំង ប្រកបដោយប្រសិទ្ធភាពខ្ពស់៕

ដោយ បៃ ស៊ីថុន