AKP កំពង់ធំ ថ្ងៃទី២២ ខែកុម្ភៈ ឆ្នាំ២០២៥-- គោលនយោបាយវិស័យស្វាយចន្ទីរបស់សម្ដេចមហាបវរធិបតីត្រូវបានបន្តជំរុញទៅមុខជាប់ជាប្រចាំ សំដៅលើកកម្ពស់ជីវភាពរបស់បងប្អូនប្រជាពលរដ្ឋ។ ឯកឧត្តម នួន ផារ័ត្ន អភិបាលខេត្តកំពង់ធំ បានមានប្រសាសន៍លើកឡើងដូចនេះ ក្នុងពិធីចុះកិច្ចសន្យាទិញ-លក់គ្រាប់ស្វាយចន្ទីសើម រវាងក្រុមហ៊ុនមីរ៉ាត់អាហ្រ្គីថេកឯ.ក និងសហគមន៍កសិកម្មក្នុងខេត្តកំពង់ធំ កាលពីថ្ងៃទី២១ ខែកុម្ភៈ ឆ្នាំ២០២៥ នៅសាលប្រជុំសាលាខេត្ត។

ខេត្តកំពង់ធំគឺជាខេត្តដែលមានសក្តានុពលលើវិស័យកសិកម្មជាពិសេសដំណាំស្វាយចន្ទី។ ដំណាំស្វាយចន្ទីនេះគឺជាគោលនយោបាយដ៏សំខាន់មួយរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាក្នុងការពង្រឹង និងពង្រីកវិស័យកសិកម្មរបស់កម្ពុជាសម្រាប់ជួយទ្រទ្រង់សេដ្ឋកិច្ចជាតិ។

ក្នុងឱកាសនោះ ឯកឧត្តម នួន ផារ័ត្ន បានមានប្រសាសន៍ថា ខេត្តកំពង់ធំមានប្រជាពលរដ្ឋប្រមាណជាង៧៣ភាគរយធ្វើកសិកម្ម ហើយថ្មីៗនេះសម្ដេចមហាបវរធិបតីបានអញ្ជើញមកកាន់ខេត្តកំពង់ធំដោយផ្ទាល់នៅសហគមន៍ស្វាយចន្ទីចំនួនពីរលើករួចមកហើយ ដើម្បីពិនិត្យមើលសហគមន៍ទំនើប ព្រមទាំងបានដាក់ចេញនូវគោលនយោបាយមួយដែលត្រឹមត្រូវចាប់តាំងពីការដាំដុះ រហូតដល់ការនាំចេញធ្វើយ៉ាងណាជំរុញឱ្យកម្ពុជាក្លាយជាប្រទេសនាំមុខគេក្នុងវិស័យស្វាយចន្ទី។

ទន្ទឹមនឹងនេះ ឯកឧត្តមអភិបាលខេត្តបានអំពាវនាវដល់សហគមន៍ស្វាយចន្ទីទាំងអស់ធ្វើការដាំដុះឱ្យស្របទៅនឹងតម្រូវការរបស់អ្នកទិញព្រមទាំងមានភាពស្មោះត្រង់រវាងអ្នកលក់ និងអ្នកទិញ៕

ដោយ ស៊ុម វណ្ណា