AKP ភ្នំពេញ ថ្ងៃទី២២ ខែកុម្ភៈ ឆ្នាំ២០២៥-- ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា កាលពីថ្ងៃទី២១ ខែកុម្ភៈ ឆ្នាំ២០២៥ បានដឹកនាំកិច្ចប្រជុំស្តីពីការពិនិត្យសូចនាករ និងការវិភាគស្ថានភាពអប់រំរយៈពេល៥ឆ្នាំ ដោយគូសបញ្ជាក់ថា ការរៀបចំឯកសារវិភាគនេះឡើងគឺដើម្បីសិក្សាបន្ថែមទៅលើនិន្នាការប្រែប្រួលរយៈពេល៥ឆ្នាំសម្រាប់ថ្នាក់ជាតិ រាជធានី ខេត្ត ក្រុង ស្រុក ខណ្ឌ នៃសូចនាករអប់រំគន្លឹះមួយចំនួន ការកំណត់បញ្ហាប្រឈម អាទិភាព និងដោះស្រាយ ជាពិសេសជំនួយដល់ការប្រើប្រាស់ស្ថិតិ និងសូចនាករអប់រំ ស្របតាមបច្ចុប្បន្នភាពនៃការធ្វើផែនការយុទ្ធសាស្រ្តវិស័យអប់រំ ការឆ្លើយតបទៅនឹងសូចនាករសមិទ្ធកម្ម និងសូចនាករយុទ្ធសាស្ត្របញ្ចកោណដំណាក់កាលទី១។

ដើម្បីជំរុញប្រសិទ្ធភាព និងប្រសិទ្ធផលការងារ ក្នុងកិច្ចប្រជុំនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្តល់អនុសាសន៍ដល់ក្រុមការងារឱ្យបន្តពិនិត្យតាមដានទិន្នន័យបន្ថែម ជាពិសេសពាក់ព័ន្ធនឹងទិន្នន័យនៅតំបន់ខេត្ត ដោយរៀបចំយន្តការត្រួតពិនិត្យ និងវាយតម្លៃច្បាស់ លាស់លើទិន្នន័យសិស្សចូលរៀន និងសិស្សបោះបង់ចុងឆ្នាំ ធ្វើការចុះទស្សនកិច្ចពិនិត្យស្ថានភាពសាលារៀនដោយផ្ទាល់ ដើម្បីយល់ដឹងច្បាស់ពីស្ថានភាពជាក់ស្តែង ប្រើប្រាស់លេខសម្គាល់ (ID) និងសំបុត្រកំណើត ដើម្បីបញ្ជាក់អត្តសញ្ញាណរបស់សិស្សឱ្យបានច្បាស់ងាយស្រួលក្នុងការវិភាគ និងផ្ទៀងផ្ទាត់ទិន្នន័យ និងរបាយការណ៍ ក្នុងគោលដៅធានាបានសុក្រឹតភាពការងារ។

បន្ថែមលើនេះ ឯកឧត្តមបានលើកទឹកចិត្តដល់ក្រុមការងារពាក់ព័ន្ធឱ្យសិក្សាលម្អិតបន្ថែមពីអត្រាសិស្សបោះ បង់ និងអត្រាសិស្សត្រួតថ្នាក់ ព្រមទាំងបញ្ហាខ្វះគ្រូ និងខ្វះបន្ទប់រៀន ដើម្បីរៀបចំបង្កើតជាសូចនាករនានាឆ្លើយតបនឹងបញ្ហាទាំងនេះ ជាពិសេសសូមឱ្យនាយកដ្ឋានពាក់ព័ន្ធទាំងអស់អនុវត្តតាមនីតិវិធី និងយន្តការដែលបានជជែកពិភាក្សា និងសម្រេចក្នុងកិច្ចប្រជុំនេះ។

សូមជម្រាបជូនថា ក្រសួងអប់រំ យុវជន និងកីឡា បានដាក់ឱ្យអនុវត្តផែនការយុទ្ធសាស្រ្តវិស័យអប់រំ២០២៤-២០២៨ ដោយបានរៀបចំស្របទៅនឹងអាទិភាពនៅក្នុងយុទ្ធសាស្រ្តបញ្ចកោណដំណាក់កាលទី១ ការវិភាគស្ថានភាពអប់រំ ការកំណត់ទិន្នន័យមូលដ្ឋាន ការពិនិត្យតាមដានវឌ្ឍនភាពតាមឆ្នាំ ផ្អែកលើទិន្នន័យប្រមូលបានពីសាលារៀនជារៀងរាល់ឆ្នាំ៕

ដោយ៖ ចាន់ សុភឿន (ប្រភព៖ ក្រសួងអប់រំ)