AKP កណ្តាល ថ្ងៃទី២១ ខែកុម្ភៈ ឆ្នាំ២០២៥--

អាកាសយានដ្ឋានអន្តរជាតិតេជោ បានសាងសង់សម្រេចប្រមាណជាង ៩៤%ហើយ ដោយគ្រោងដាក់ឱ្យដំណើរការជាផ្លូវការ នៅខែកក្កដា ឆ្នាំ២០២៥ខាងមុខនេះ ក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។ 

តាមការបញ្ជាក់របស់លោកឧកញ៉ា ឆាលស៍ វ៉ាន់ នាយកគ្រប់គ្រងនៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) ក្រោយបញ្ចប់ដំណើរទស្សនិច្ចរបស់គណៈប្រតិភូជាន់ខ្ពស់ នៃស្ថានទូតអូស្រ្តាលី និងហ្វីលីពីន ដែលបានអញ្ជើញពិនិត្យវឌ្ឍនភាព នៃដំណើរការសាងសង់អាកាសយានដ្ឋានអន្តរជាតិតេជោ នៅរសៀលថ្ងៃទី២១ ខែកុម្ភៈ ឆ្នាំ២០២៥នេះ បានឱ្យដឹងថា ទាំងខាងអាកាសចរណ៍ស៊ីវិល ខាងក្រុមហ៊ុនបម្រើសេវាអាកាសចរណ៍ រួមនឹងក្រុមហ៊ុនបម្រើសេវាកម្មពាក់ព័ន្ធទាំងអស់ បាននិងកំពុងតែរៀបចំ និងត្រៀមខ្លួន ដើម្បីដំណើរការទៅតាមផែនការ ក្នុងការបើកដំណើរការជាផ្លូវការ នៅក្នុងខែកក្កដាខាងមុខនេះ។

លោកឧញ៉ា បានបន្តថា ការងារចុងក្រោយដែលនៅសេសសល់ គឺជាការងារតិចតួច ប៉ុន្តែក្រុមការងារកំពុងតែញាប់ដៃញាប់ជើង ដើម្បីបំពេញការងារដែលនៅសេសសល់ ឈានដល់ការបញ្ចប់ទាំងស្រុង ខណៈព្រលានយន្តហោះអន្តរជាតិតេជោថ្មីនេះ មិនត្រឹមតែរៀបចំដើម្បីទទួលភ្ញៀវទេសចរប៉ុណ្ណោះទេ ក៏នៅមានទីតាំងភោជនីយដ្ឋាន ការលក់វត្ថុអនុស្សាវរីយ៍ ថែមទាំងមានការរៀបចំជាកន្លែងស្នាក់នៅសម្រាប់ភ្ញៀវផងដែរ។ 

នាឱកាសនោះដែរ លោកឧញ៉ា ក៏បានបង្ហើបឱ្យដឹងផងដែរថា ស្ថានទូតហ្វីលីពីន តាមរយៈក្រុមហ៊ុនអាកាសចរណ៍ពីហ្វីលីពីន នឹងមកសហការជាមួយកម្ពុជាក្នុងពេលខាងមុខ ក្នុងការបើកសាលាបណ្តុះបណ្តាលជួសជុលយន្តហោះ នៅសាកលវិទ្យាល័យ ខេមតិច ផងដែរ ប៉ុន្តែលោកឧញ៉ាមិនទាន់ដឹងថាសាកលវិទ្យាល័យនេះ នឹងបើកដំណើរការពេលណានោះទេ។ 

សូមជម្រាបជូនថា ឯកអគ្គរដ្ឋទូត ចំនួន២ប្រទេស ដែលបានអញ្ជើញទស្សនកិច្ច នៅរសៀលថ្ងៃនេះ រួមមាន៖ ឯកឧត្តម Derek Yip ឯកអគ្គរាជទូតវិសាមញ្ញ និងពេញសមត្ថភាពនៃស្ថានទូតអូស្រ្តាលីប្រចាំនៅកម្ពុជា និងលោកជំទាវ Plerida Ann Camille P. Mayo ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋហ្វីលីពីនប្រចាំនៅកម្ពុជា ក្នុងគោលបំណងដើម្បីពិនិត្យវឌ្ឍនភាពនៃដំណើរការសាងសង់ព្រលានយន្តហោះអន្តរជាតិតេជោ ដែលមានទីតាំងស្ថិតនៅឃុំព្រែកស្លែង ស្រុកកណ្តាលស្ទឹង និងក្រុងតាខ្មៅ នៃខេត្តកណ្តាល និងផ្នែកខ្លះនៃស្រុកបាទី ខេត្តតាកែវ។ 

សូមបញ្ជាក់ទៀតថា ព្រលានយន្តហោះថ្មីនេះ សាងសង់ឡើងលើផ្ទៃដីជាង ២ ៦០០ហិកតា ជាព្រលានយន្តហោះលំដាប់ F4 ដែលអាចធ្វើឱ្យយន្តខ្នាតធំចុះចតបានដូចជា ប្រភេទ Airbus A380 និងប្រភេទ Boeing 747 និងអាចទទួលអ្នកដំណើរបានរហូតដល់ ១៣លាននាក់ ក្នុង១ឆ្នាំ ក្នុងដំណាក់កាលទី១៕

ដោយ៖ គង់ សិរីរ័ត្ន, រូបថត៖ គល់ រ៉េននី