AKP ភ្នំពេញ ថ្ងៃទី២១ ខែកុម្ភៈ ឆ្នាំ២០២៥ -- ក្រសួងការបរទេសរបស់ទីក្រុងសេអ៊ូល បាននិយាយថា ប្រទេសកូរ៉េខាងត្បូង និងនូវែលសេឡង់ បានពិភាក្សាគ្នាកាលពីថ្ងៃព្រហស្បតិ៍ លើកិច្ចខិតខំប្រឹងប្រែងដើម្បីបង្កើនកិច្ចសហប្រតិបត្តិការក្នុងបញ្ហាទាក់ទងនឹងសន្តិសុខសេដ្ឋកិច្ច រួមទាំងបច្ចេកវិទ្យាថាមពល ពាណិជ្ជកម្ម និងការវិនិយោគ។

ប្រទេសទាំងពីរបានបើកកិច្ចសន្ទនាសេដ្ឋកិច្ចរួមគ្នាលើកទី១៦ នៅទីក្រុងវេលលីងតុន ដឹកនាំដោយ លោក គីម ហេសាំង (Kim Hee-sang)អនុរដ្ឋមន្ត្រីការបរទេសទទួលបន្ទុកកិច្ចការសេដ្ឋកិច្ច និងលោក ហ្គាហាម ម័រតុន (Grahame Morton) អនុលេខារងរបស់សហរដ្ឋអាមេរិក និងជាប្រធាន Asia Group នៅឯក្រសួងការបរទេសនូវែលសេឡង់។

លោក គីម បានលើកឡើងពីសារៈសំខាន់នៃកិច្ចសហប្រតិបត្តិការទ្វេភាគី និងការសម្របសម្រួលរវាងប្រទេសកូរ៉េខាងត្បូង និងនូវែលសេឡង់ដោយមើលឃើញពីការកើនឡើងនៃទំនាក់ទំនងរវាងសេដ្ឋកិច្ច និងសន្តិសុខ។

នៅក្នុងវិសាលភាពនេះ កិច្ចពិភាក្សាបានផ្តោតលើកិច្ចខិតខំប្រឹងប្រែងដើម្បីពង្រឹងកិច្ចសហប្រតិបត្តិការក្នុងវិស័យកសិកម្ម និងផលិតផលសមុទ្រវិទ្យាសាស្ត្រ និងបច្ចេកវិទ្យា ថាមពល និងខ្សែសង្វាក់ផ្គត់ផ្គង់ រួមទាំងផែនការធ្វើការរួមគ្នាក្នុងវិស័យរ៉ែសំខាន់ៗ។ ភាគីទាំងពីរក៏បានពិភាក្សាអំពីវិធីពង្រីកការផ្លាស់ប្តូររវាងប្រជាជន និងប្រជាជនក្នុងវិស័យទេសចរណ៍ និងការអប់រំ។

ក្រសួងបានបន្ថែមថា កាលពីថ្ងៃព្រហស្បតិ៍ លោក គីម បានទៅទស្សនាវិទ្យាស្ថានអវកាសនៅសាកលវិទ្យាល័យ Auckland និងក្រុមហ៊ុនRocket Lab ដែលជាក្រុមហ៊ុនអវកាសឯកជន ដើម្បីស្វែងយល់ពីសក្តានុពលសម្រាប់ការស្រាវជ្រាវរួមគ្នានៅក្នុងវិស័យអវកាស៕

ដោយ៖ មូល មិនា (ប្រភព៖ យ៉ុនហាប់)