AKP ភ្នំពេញ ថ្ងៃទី២១ ខែកុម្ភៈ ឆ្នាំ២០២៥ -- អ្នកជម្ងឺភ្នែកឡើងបាយសរុបចំនួន ៦០០នាក់ក្នុងប្រទេសហ្ស៊ីមបាវ៉េ នឹងទទួលបានការវះកាត់ដោយឥតគិតថ្លៃពីវេជ្ជបណ្ឌិតចិន ក្រោមកម្មវិធី «Bright Journey» ដែលផ្តល់ដោយប្រទេសចិន។

លោកស្រី ហុង ស៊ីនឈីន (Hong Xiuqin) ជាប្រធានក្រុមបានប្រាប់សារព័ត៌មាន Xinhua ថាក្រុមវេជ្ជបណ្ឌិតចំនួន ១២នាក់មកពីមន្ទីរពេទ្យប្រជាជនខេត្តហ៊ូណាន ប្រទេសចិន នឹងធ្វើការវះកាត់ចាប់ពីថ្ងៃទី២៣ ខែកុម្ភៈដល់ថ្ងៃទី១ ខែមីនា នៅទីក្រុង Harare ប្រទេសហ្ស៊ីមបាវ៉េ។

លោកស្រី ហុង បាននិយាយថា ការពិនិត្យអ្នកជំងឺដែលមានសិទ្ធិបានចាប់ផ្តើមនៅថ្ងៃទី១២ ខែកុម្ភៈ ហើយបច្ចុប្បន្នកំពុងដំណើរការ ដោយលោកស្រីបានបន្ថែមថា ក្រុមគ្រូពេទ្យចិននឹងសហការជាមួយវេជ្ជបណ្ឌិតក្នុងតំបន់ ផ្តល់ការបណ្តុះបណ្តាលនៅនឹងកន្លែង និងចូលរួមក្នុងការផ្លាស់ប្តូរការសិក្សាជាមួយបុគ្គលិកថែទាំសុខភាពហ្ស៊ីមបាវ៉េ។

កម្មវិធីនេះប្រារព្ធខួបលើកទី៤៥ នៃទំនាក់ទំនងការទូតរវាងប្រទេសចិននិងហ្ស៊ីមបាវ៉េ និងខួបលើកទី៤០ នៃកិច្ចសហប្រតិបត្តិការផ្នែកវេជ្ជសាស្រ្តទ្វេភាគី។

លោក បូនីហ្វេស ម៉ាចេកា (Boniface Macheka) ប្រធានផ្នែកជំងឺភ្នែកនៅមន្ទីរពេទ្យ Parirenyatwa Group បានសរសើរគំនិតផ្តួចផ្តើមនេះថាជាសក្ខីភាពមួយចំពោះទំនាក់ទំនងប្រទេសហ្ស៊ីមបាវ៉េ-ចិន។

លោកបានប្រាប់សារព័ត៌មាន Xinhua ថា «យើងមានមូលដ្ឋានប្រវត្តិសាស្ត្រសម្រាប់ទំនាក់ទំនងរវាងប្រទេសរបស់យើង និងប្រទេសចិន។ខ្ញុំជឿថាទំនាក់ទំនងនេះនឹងកាន់តែរឹងមាំបន្ថែមទៀតដោយកម្មវិធីនេះ»។

លោកបានបង្ហាញក្តីសង្ឃឹមសម្រាប់កិច្ចសហប្រតិបត្តិការផ្នែកវេជ្ជសាស្រ្តទ្វេភាគីបន្ថែមទៀតនាពេលអនាគត។ លោកបានមានប្រសាសន៍ថា«យើងសង្ឃឹមថានឹងអាចបង្កើនភាពចម្រុះនៃការវះកាត់ដែលយើងធ្វើនៅមន្ទីរពេទ្យនេះ ដើម្បីឱ្យយើងអាចបម្រើប្រជាជនរបស់យើង និងធ្វើឱ្យសេវាកម្មកាន់តែប្រសើរឡើង»៕

ដោយ៖ មូល មិនា (ប្រភព៖ ភីបផលដេលី)