AKP ភ្នំពេញ ថ្ងៃទី២១ ខែកុម្ភៈ ឆ្នាំ២០២៥

ឯកឧត្ដម ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយអប់រំ និងទំនាក់ទំនងសាធារណៈនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនបានចាត់ទុកមេភូមិជាសមាសភាពសំខាន់ ក្នុងការជួយឱ្យប្រជាពលរដ្ឋប្រើប្រាស់ App NoDrug។ ការលើកឡើងរបែបនេះ នាឱកាសអញ្ជើញចូលរួមជាវាគ្មិននៅក្នុងវេទិកាតុមូលនៅអគ្គនាយកដ្ឋានវិទ្យុកម្ពុជា ក្រោមប្រធានបទ «យុវជនចូលរួមប្រយុទ្ធប្រឆាំងគ្រឿងញៀន ដើម្បីលើកស្ទួយវប្បធម៌ជាតិ» កាលពីថ្ងៃទី២០ ខែកុម្ភ: ឆ្នាំ២០២៥ នៅអគ្គនាយកដ្ឋានវិទ្យុជាតិកម្ពុជា។

ក្នុងឱកាសនោះ ឯកឧត្ដម ឧត្តមសេនីយ៍ឯក លឹម តុងហួត មានប្រសាសន៍ថា ដើម្បីឱ្យកម្មវិធីទូរសព្ទដៃ NoDrug នេះឆាប់បានដឹងដល់ប្រជាពលរដ្ឋទូទៅកាន់តែឆាប់នោះគឺមេភូមិជាអ្នកដើរតួនាទីយ៉ាងសំខាន់បំផុត ព្រោះថាមេភូមិគឺនៅជិត នៅជាប់នឹងប្រជាពលរដ្ឋ ដូច្នេះរាល់ការផ្សព្វផ្សាយរបស់មេភូមិគឺជាព័ត៌មានពិតហើយប្រជាពលរដ្ឋនឹងអាចទទួលយកបានដូចនេះការផ្សព្វផ្សាយពីអត្ថប្រយោជន៍ App Nodrug នឹងទទួលបានជោគជ័យបន្ថែមទៀត។ ឯកឧត្ដម ឧត្តមសេនីយ៍ឯកបានថ្លែងពាំនាំនូវការកោតសរសើរពីឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រីប្រធានអាជ្ញាធរជាតិប្រយុទ្ធប្រឆាំងគ្រឿងញៀនជូនដល់អគ្គនាយកដ្ឋានវិទ្យុជាតិកម្ពុជានៃក្រសួងព័ត៌មានដែលតែងតែសហការជួយដល់ការងារផ្សព្វផ្សាយពីបញ្ហាគ្រឿងញៀនផ្តល់ព័ត៌មានពិតពីបញ្ហាគ្រឿងញៀនដើម្បីឱ្យប្រជាពលរដ្ឋបានដឹង បានឮ បានយល់ ទទួលយក និងចូលរួមកាន់តែសកម្មក្នុងការងារប្រយុទ្ធប្រឆាំងគ្រឿងញៀន។

ឯកឧត្ដម ឧត្តមសេនីយ៍ឯក លឹម តុងហួត បានគូសបញ្ជាក់ផងដែរថា រាជរដ្ឋាភិបាលនីតិកាលទី៧ ដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានដាក់ការងារពីការងារអាទិភាពដែលតម្រូវឱ្យមាមានការចូលរួមគ្រប់សមត្ថភាពទាំងអស់ជាចលនាជាតិមួយ ក្នុងនោះ ការងារផ្សព្វផ្សាយអប់រំគឺជាការងារអាទិភាពទី១សំដៅឱ្យគ្រប់សមាសភាពទាំងអស់នៅក្នុងសង្គមត្រូវតែចូលរួម និងទទួលបាននូវសារអប់រំពាក់ព័ន្ធនឹងបញ្ហាគ្រឿងញៀនដើម្បីចាកចេញផុតបានពីការមិនទៅជក់ មិនជួញគ្រឿងញៀនដែលនាំឱ្យនាំទុកដល់ខ្លួនឯង នាំចំបែងដល់ក្រុមគ្រួសារ នាំបញ្ហាដល់សហគមន៍និងសង្គមជាតិយើងទាំងមូល។

ក្នុងកិច្ចពិភាក្សានោះដែរ ឯកឧត្ដមឧត្តមសេនីយ៍ឯក លឹម តុងហួត បានលើកឡើងពីរការងារលេចធ្លោក្នុងរយៈពេលមួយឆ្នាំនៃការងារប្រយុទ្ធប្រឆាំងគ្រឿងញៀននៃនីតិកាលទី ៧ ដែលក្នុងនោះអាជ្ញាធរជាតិប្រយុទ្ធប្រឆាំងគ្រឿងញៀនបានដាក់ការងារប្រយុទ្ធប្រឆាំងគ្រឿងញៀនតាមប្រព័ន្ធឌីជីថលគឺកម្មវិធីទូរសព្ទដៃ NoDrug ដែលទទួលបានការគាំទ្រពីប្រជាពលរដ្ឋទូទៅ។ ឯកឧត្ដមឧត្ដមសេនីយ៍ឯកបានបញ្ជាក់ទៀតថា ក្នុង រយៈពេល១០ខែកន្លងទៅនេះ មានអ្នកចូលប្រើប្រាស់កម្មវិធីនេះរហូតដល់ជាង ៤ម៉ឺននាក់ ហើយមានការរាយការណ៍ពីករណីគ្រឿងញៀនលើសពី១ពាន់ករណី និងកម្ពុជាគ្មានការផលិតកែច្នៃគ្រឿងញៀន និងទប់ស្កាត់ការចរាចរគ្រឿងញៀនឆ្លងកាត់ព្រំដែនកម្ពុជាបានដាក់ App NoDrug ឱ្យប្រជាពលរដ្ឋនៅភូមិជាប់នឹងតំបន់ព្រំដែនប្រើប្រាស់រាយការណ៍៕

ដោយ៖ រិទ្ធី ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន