AKP ភ្នំពេញ ថ្ងៃទី២១ ខែកុម្ភៈ ឆ្នាំ២០២៥ -- នៅមជ្ឈមណ្ឌលជាតិរក្សាសន្តិភាព នាព្រឹកថ្ងៃទី២១ ខែកុម្ភៈ ឆ្នាំ២០២៥ លោកវរសេនីយ៍ឯក ISHIHARA Masanao នាយការិយាល័យអនុព័ន្ធយោធាជប៉ុនប្រចាំកម្ពុជាដែលត្រូវចប់បេសកកម្ម បានអញ្ជើញចូលជួបសម្តែងការគួរសម និងជម្រាបលាឯកឧត្តម ឧត្តមសេនីយ៍ទោ សែម រតនា អនុប្រធានទី១គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព ដោយក្នុងជំនួបនោះ ឯកឧត្តម ឧត្តមសេនីយ៍ទោ សែម រតនា បានថ្លែងអំណរគុណយ៉ាងជ្រៀលជ្រៅដល់ភាគីជប៉ុនដែលតែងបន្តរក្សានូវកិច្ចសហប្រតិបត្តិការដ៏ត្រចះត្រចង់ជាមួយមជ្ឈមណ្ឌលជាតិរក្សាសន្តិភាព។

ជាមួយគ្នានេះដែរ ឯកឧត្តមបានចាត់ទុកការសហការពីភាគីជប៉ុន ជាមួយមជ្ឈមណ្ឌលជាតិរក្សាសន្តិភាពថា ជាកិច្ចការដ៏មានសារៈសំខាន់ ក្នុងនោះជប៉ុនបានជួយដល់វគ្គបំប៉នក្នុងប្រទេសដល់កងកម្លាំងរក្សាសន្តិ ភាពរបស់កម្ពុជាឱ្យមានសមត្ថភាពគ្រប់គ្រាន់ សម្រាប់ការបំពេញបេសកកម្មនៅក្រៅប្រទេសក្រោមឆ័ត្រ របស់អង្គការសហប្រជាជាតិលើមុខជំនាញបច្ចេកទេសវិស្វកម្ម និងវាស់ស្ទង់គ្រូបង្គោល ជំនាញបញ្ជាប្រើប្រាស់គ្រឿងចក្រវិស្វកម្មធុនធ្ងន់នីវ៉ាឡឺរ  ជំនាញគ្រប់គ្រងការដ្ឋានសំណង់ ជំនាញបញ្ជាប្រើប្រាស់គ្រឿងចក្រវិស្វកម្មធុនធ្ងន់ អិចស្កាវ៉ាទ័រជាដើម។

ចំពោះវគ្គបំប៉នក្រៅប្រទេស ឯកឧត្តម ឧត្តមសេនីយ៍ទោ សែម រតនា បានលើកឡើងថា សិក្ខាកាមមួយចំនួនទទួលវគ្គបំប៉នវិស្វកម្មសំណង់ផ្ដេក និងគ្រឿងផ្ទុះនាពេលកន្លងទៅនៅប្រទេសជប៉ុន ហើយបច្ចុប្បន្នជប៉ុនកំពុងរៀបចំសាលាហ្វឹកហ្វឺនកងកម្លាំងរក្សាសន្តិភាពកំពង់ស្ពឺ ដើម្បីធ្វើជាម្ចាស់ផ្ទះលើគម្រោងត្រីភាគី ជប៉ុន អង្គការសហប្រជាជាតិ និងកម្ពុជាថែមទៀតផង។

ជាមួយគ្នានេះដែរ ឯកឧត្តមបានសំណូមពរដល់ភាគីជប៉ុនឱ្យផ្តល់ការហ្វឹកហ្វឺនបន្តទៀតលើមុខជំនាញចាំបាច់នានា ដើម្បីពង្រឹងសមត្ថភាពមុននឹងចល័តដល់កងវិស្វកម្មកម្ពុជាសម្រាប់បេសកកម្មអង្គការសហប្រជាជាតិ។

ជាការឆ្លើយតបលោកវរសេនីយ៍ឯក ISHIHARA Masanao បានសម្តែងនូវការពេញចិត្តចំពោះកិច្ចសហប្រតិបត្តិការរវាងមជ្ឈមណ្ឌលជាតិរក្សាសន្តិភាព និងការិយាល័យអនុព័ន្ធយោធាជប៉ុនប្រចាំកម្ពុជានាពេលកន្លងមក ហើយសង្ឃឹមថាភាគីទាំងពីរនឹងបន្តកិច្ចសហការដ៏ល្អនេះជាបន្តទៅទៀត៕

ដោយ៖ ចាន់ សុភឿន