AKP កំពត ថ្ងៃទី២១ ខែកុម្ភៈ ឆ្នាំ២០២៥ -- សហគមន៍នេសាទកំពង់សាមគ្គីជាសហគមន៍ធំជាងគេមួយនៅខេត្តកំពត ដែលសំបូរដោយធនធានសមុទ្រ។ កំពង់សាមគ្គីត្រូវបានរៀបចំជាតំបន់អេកូទេសចរណ៍ក្រោយគេក៏ពិតមែន ប៉ុន្តែទទួលបានការចាប់អារម្មណ៍ និងមកលេងកម្សាន្តពីភ្ញៀវច្រើនឡើងៗ។ ដើម្បីបំពេញតម្រូវការភ្ញៀវ ប្រធានសហគមន៍ អាជ្ញាធរស្រុក មន្ត្រីជំនាញពាក់ព័ន្ធ អង្គការដៃគូ បាន និងកំពុងខិតខំអភិវឌ្ឍសហគមន៍បន្ថែមទៀត ដើម្បីទាក់ទាញភ្ញៀវឱ្យបានកាន់តែច្រើន។ 

លោក សុខ កៅ ប្រធានសហគមន៍នេសាទកំពង់សាមគ្គី  បានប្រាប់ឱ្យដឹងនៅព្រឹកថ្ងៃទី២១ ខែកុម្ភ: ឆ្នាំ២០២៥ ថា ទោះបីជាសហគមន៍រៀបចំជាតំបន់អេកូទេសចរណ៍ធម្មជាតិ ក្រោយគេ ហើយមិនទាន់រួចរាល់១០០%ក៏ពិតមែន ប៉ុន្តែទទួលបានការគាំទ្រ និងមកលេងកម្សាន្តរបស់ភ្ញៀវ កើនឡើងពីមួយឆ្នាំទៅមួយឆ្នាំ ព្រោះសហគមន៍មានទេសភាពស្អាត ខ្យល់អាកាសបរិសុទ្ធ  និងសកម្មភាពកម្សាន្តច្រើន។ 

លោក ម៉ាត់ ត្រហេត អ្នកសម្របសម្រួលកម្មវិធីរបស់អង្គការ អេដ អេ អាកស្យុងប្រចាំតំបន់ឆ្នេរ  បានបញ្ជាក់ដែរថា ដើម្បីជំរុញវិស័យទេសចរណ៍របស់សហគមន៍ អង្គការលោកបាននឹងកំពុងខិតខំជួយ អភិវឌ្ឍន៍លើហេដ្ឋរចនាសម្ព័ន្ធ និងជួយពង្រីកសេវាកម្មមួយចំនួន។ 

ភ្ញៀវទេសចរមកពីគ្រប់បណ្តាខេត្ត ពិសេសអ្នកមកពីរាជធានីភ្នំពេញ បានបង្ហាញចំណាប់អារម្មណ៍របស់ខ្លួនថា សហគមន៍កំពង់សាមគ្កីពិតជាទីដែលភ្ញៀវចង់មកដើរលេងកម្សាន្ត និងស្នាក់នៅខ្លាំងណាស់ ព្រោះនៅតំបន់នេះមានទេសភាពល្អត្រកាល និងមានខ្យល់អាកាសយ៉ាងត្រជាក់ បែបធម្មជាតិ ។ 

លោក អំ តារា សមាជិកប្រធានក្រុមប្រឹក្សាស្រុកទឹកឈូ បានបញ្ជាក់នៅព្រឹកថ្ងៃដដែលថា ដើម្បីលើកកម្ពស់ជីវភាពរបស់ប្រជាសហគមន៍ឱ្យកាន់តែប្រសើរ អាជ្ញាធរ មន្ត្រីជំនាញពាក់ព័ន្ធ អង្គការដៃគូកំពុងរួមដៃគ្នា ធ្វើយ៉ាងណាប្រែក្លាយសហគមន៍នេះ ឱ្យទៅជាសហគមន៍អេកូទេសចរណ៍ដ៏ទាក់ទាញ និងជាគោលដៅទេសចរណ៍សំខាន់របស់ស្រុកទឹកឈូ ខេត្តកំពត។ 

សូមបញ្ជាក់ថា សហគមន៍កំពង់សាមគ្គីមានទីតាំងនៅភូមិកំពង់ត្នោត ឃុំកូនសត្វ ស្រុកទឹកឈូ ខេត្តកំពត ដោយសហគមន៍នេះបានបង្កើតឡើងនៅឆ្នាំ២០០៦ បច្ចុប្បន្នសហគមន៍មានសមាជិក៤០៣គ្រួសារ មានផ្ទៃដី៥៧៧ហិកតា ចែកជា៤តំបន់ មាន៖ តំបន់នេសាទទឹករាក់សម្រាប់ការនេសាទលក្ខណៈគ្រួសារ  មានវាលខ្សាច់ និងវាលភក់ ៤៦,៤៥ហិកតា ព្រៃកោងកាង៧២ហិកតា និងស្មៅសមុទ្រ៥០ហិកតា៕

ដោយ ប្រាក់ លាង