AKP ភ្នំពេញ ថ្ងៃទី២១ ខែកុម្ភៈ ឆ្នាំ២០២៥-- សិស្សសាលាអន្តរទ្វីបអាមេរិកាំងថ្នាក់ទី៧ ទី៨ និងទី៩ ជាង៣០០នាក់ មកពីសាខាចោមចៅ និងចាក់អង្រែក្រោម ទទួលបានចំណេះដឹងពីសិក្ខាសាលាស្តីពីផលប៉ះពាល់នៃគ្រឿងញៀន បារីអេឡិចត្រូនិក និងApp NoDrug រយៈ​ពេលពីរថ្ងៃពីថ្ងៃទី១៩ ដល់ថ្ងៃទី២០ ខែកុម្ភ: ឆ្នាំ២០២៥ ដោយក្នុងឱកាសនោះ ឯកឧត្តម ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈនៃអាជ្ញាធរជាតិប្រយុទ្ធប្រឆាំងគ្រឿងញៀន បានថ្លែងអំណរគុណចំពោះថ្នាក់ដឹកនាំ និងគណៈគ្រប់គ្រងសាលាអន្តរទ្វីបអាមេរិកាំង ដែលបានចូលរួមលើកកម្ពស់ការយល់ដឹងស្តីពីផលប៉ះពាល់នៃគ្រឿងញៀន បារីអេឡិចត្រូនិក និង App NoDrug ដល់សិស្សានុសិស្ស ដើម្បីពួកគេមានចំណេះដឹងគ្រប់គ្រាន់ក្នុងការចូលរួមសកម្មភាពការងារប្រយុទ្ធប្រឆាំងគ្រឿងញៀនកាន់តែសកម្មបន្ថែមទៀត។

ឯកឧត្តម ឧត្តមសេនីយ៍ឯក លឹម តុងហួត ថ្លែងថា ការផ្សព្វផ្សាយពីបញ្ហាគ្រឿងញៀនតាមរយៈសិស្សានុ សិស្ស ពិតជាបានដល់ក្រុមគ្រួសារ និងសហគមន៍របស់ពួកគេ ព្រោះថាពួកគេមានឱកាសចូលមកសិក្សាផ្ទាល់ទទួលចំណេះដឹងផ្ទាល់ពីអាជ្ញាធរជាតិប្រយុទ្ធប្រឆាំងគ្រឿងញៀន។ ដូច្នេះពួកគេនឹងមានមូលដ្ឋានគ្រប់គ្រាន់ក្នុងការជួយអប់រំបន្ត "យុវជនល្អ រួមគ្នាគាំទ្រកម្ចាត់គ្រឿងញៀន "។

ជាមួយគ្នានេះដែរ ឯកឧត្តមបានសំណូមពរដល់អ្នកចូលរួមសូមយកចំណេះដឹងទៅផ្សព្វផ្សាយបន្តដល់ក្រុមគ្រួសារ និងមនុស្សជាទីស្រឡាញ់ពីគ្រោះថ្នាក់នៃគ្រឿងញៀន និងបារីអេឡិចត្រូនិក ដើម្បីរួមគ្នាប្រយុទ្ធប្រឆាំងគ្រឿងញៀន មិនប្រើបារីអេឡិកត្រូនិក រួមគ្នាផ្សព្វផ្សាយ និងប្រើប្រាស់ App NoDrug : https://nodrugsnacd.com/download ដើម្បីរាយការណ៍រាល់ករណីគ្រឿងញៀននៅមូលដ្ឋានទាំងអស់គ្នា និងត្រូវចងចាំថា "សហគមន៍អាចរីកចម្រើនទៅបាន លុះត្រាតែគ្មានបញ្ហាគ្រឿងញៀនញាំញី"៕

ដោយ៖ ចាន់ សុភឿន (ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន)