AKP ភ្នំពេញ ថ្ងៃទី២០ ខែកុម្ភៈ ឆ្នាំ២០២៥ -- ក្រសួងការពារជាតិរបស់ទីក្រុងសេអ៊ូល បាននិយាយថា ប្រទេសកូរ៉េខាងត្បូង និងកាមេរូន កាលពីថ្ងៃពុធ បានចុះហត្ថលេខាលើកិច្ចព្រមព្រៀងមួយក្នុងគោលបំណងពង្រឹងកិច្ចសហប្រតិបត្តិការទ្វេភាគីរបស់ពួកគេនៅក្នុងវិស័យការពារជាតិ និងឧស្សាហកម្មអាវុធ។

ក្រសួងបាននិយាយថា រដ្ឋមន្ត្រីការពារជាតិស្តីទី លោក គីម ស៊ុនហូ (Kim Seon-ho) និងរដ្ឋមន្ត្រីការពារជាតិកាមេរូន លោក ចូសេប បេទី អាសសូម៉ូ (Joseph Beti Assomo) បានចុះហត្ថលេខាលើកិច្ចព្រមព្រៀងនេះ ក្នុងអំឡុងពេលកិច្ចប្រជុំដែលធ្វើឡើងនៅទីក្រុងសេអ៊ូល។

នេះ​ជា​លើក​ទី​មួយ​ហើយ​ដែល​ក្រសួង​ការពារ​ជាតិ​របស់​ក្រុង​សេអ៊ូល ​បាន​ចុះ​ហត្ថលេខា​លើ​កិច្ច​ព្រម​ព្រៀង​បែប​នេះ​ជាមួយ​នឹង​ប្រទេសនៅទ្វីប​អាហ្រ្វិក។

នៅក្រោមកតិកាសញ្ញានេះ ភាគីទាំងពីរបានព្រមព្រៀងគ្នាក្នុងការពង្រីកការអប់រំយោធា និងការផ្លាស់ប្តូរក៏ដូចជាស្វែងរកមធ្យោបាយពង្រឹងកិច្ចសហប្រតិបត្តិការអាវុធតាមរយៈការដេញថ្លៃរបស់ប្រទេសកាមេរូន ដើម្បីធ្វើទំនើបកម្មប្រព័ន្ធព័ត៌មានការពារជាតិរបស់ខ្លួន។

លោក គីម បានណែនាំប្រព័ន្ធសព្វាវុធរបស់ប្រទេសកូរ៉េខាងត្បូង ដូចជាយានជំនិះ និងឧទ្ធម្ភាគចក្រប្រើប្រាស់ធុនមធ្យម ហើយលោកបានសង្កត់ធ្ងន់ថា ប្រទេសកូរ៉េខាងត្បូងអាចដើរតួនាទីយ៉ាងសំខាន់ក្នុងការបង្កើតប្រព័ន្ធព័ត៌មានស្ថិរភាពសម្រាប់ក្រសួងការពារជាតិកាមេរូន។

យោងតាមក្រសួង បានឱ្យដឹងថា នៅក្នុងជំនួបនោះ ប្រមុខការពារជាតិទាំងពីរបានឯកភាពគ្នាលើតម្រូវការសម្រាប់ការឆ្លើយតបច្បាស់លាស់ និងរួមពីសហគមន៍អន្តរជាតិ ដើម្បីទប់ទល់នឹងការញុះញង់នុយក្លេអ៊ែរ និងមីស៊ីលជាបន្តបន្ទាប់របស់ប្រទេសកូរ៉េខាងជើង៕

ដោយ៖ មូល មិនា (ប្រភព៖ យ៉ុនហាប់)