AKP ភ្នំពេញ ថ្ងៃទី២០ ខែកុម្ភៈ ឆ្នាំ២០២៥ -- ក្រសួងការបរទេសរបស់ទីក្រុងសេអ៊ូលបាននិយាយកាលពីថ្ងៃពុធថា ប្រទេសកូរ៉េខាងត្បូងមានឆន្ទៈក្នុងការផ្តល់ការការពារ និងការគាំទ្រ ប្រសិនបើទាហានកូរ៉េខាងជើងដែលត្រូវបានចាប់ខ្លួនក្នុងប្រទេសអ៊ុយក្រែន ស្នើសុំឱ្យមកប្រទេសកូរ៉េខាងត្បូង បន្ទាប់ពីមានសេចក្តីរាយការណ៍ថា ទាហានកូរ៉េខាងជើងដែលកាន់កាប់ដោយកងកម្លាំងអ៊ុយក្រែនបានបង្ហាញពីចេតនារបស់លោកក្នុងការរត់ចោលជួរ។

នៅក្នុងបទសម្ភាសន៍ជាមួយកាសែត Chosun Ilbo ប្រចាំថ្ងៃដែលបានចេញផ្សាយកាលពីថ្ងៃពុធ បានឱ្យដឹងថា ទាហានកូរ៉េខាងជើងម្នាក់ក្នុងចំណោមទាហានកូរ៉េខាងជើង ២នាក់ដែលត្រូវបានចាប់ខ្លួនដោយអ៊ុយក្រែនបានបង្ហាញពីបំណងចង់មកប្រទេសកូរ៉េខាងត្បូង នេះជាករណីលើកដំបូងចាប់តាំងពីប្រទេសកូរ៉េខាងជើងបានបញ្ជូនទាហានប្រហែល ១១.០០០នាក់ដើម្បីគាំទ្រសង្គ្រាមរបស់រុស្ស៊ីប្រឆាំងនឹងអ៊ុយក្រែន។

លោកគឺជាទាហានម្នាក់ក្នុងចំណោមទាហានកូរ៉េខាងជើងដែលរងរបួស ២នាក់ត្រូវបានចាប់ខ្លួនដោយកងកម្លាំងអ៊ុយក្រែន កាលពីខែមុន ក្នុងអំឡុងពេលប្រយុទ្ធនៅក្នុងព្រំដែនតំបន់ឃឺស ភាគខាងលិចរបស់ប្រទេសរុស្ស៊ី។

ក្រសួងការបរទេសបាននិយាយថា «ទាហានកូរ៉េខាងជើងត្រូវបានទទួលស្គាល់ដោយរដ្ឋធម្មនុញ្ញថាជាពលរដ្ឋរបស់យើង និងគោរពឆន្ទៈសេរីរបស់ពួកគេទាក់ទងនឹងការធ្វើមាតុភូមិនិវត្តន៍ស្របតាមច្បាប់អន្តរជាតិ និងទំនៀមទម្លាប់ប្រពៃណី» ។

ក្រសួងបាននិយាយថា «រដ្ឋាភិបាលនឹងផ្តល់ការការពារ និងការគាំទ្រជាចាំបាច់ ប្រសិនបើពួកគេស្នើសុំមកប្រទេសកូរ៉េខាងត្បូង ស្របតាមគោលការណ៍ជាមូលដ្ឋាន និងច្បាប់ពាក់ព័ន្ធនៃការទទួលយកបុគ្គលទាំងអស់»៕

ដោយ៖ មូល មិនា (ប្រភព៖ យ៉ុនហាប់)