AKP ភ្នំពេញ ថ្ងៃទី២០ ខែកុម្ភៈ ឆ្នាំ២០២៥ -- ប្រព័ន្ធផ្សព្វផ្សាយក្នុងស្រុកបានរាយការណ៍ថា ប្រទេសម៉ាឡាវី ម៉ូសំប៊ិក និងហ្សំប៊ី កំពុងធ្វើការរួមបញ្ចូលប្រព័ន្ធគយរបស់ពួកគេដើម្បីបង្កើនពាណិជ្ជកម្ម ដោយសិក្ខាសាលារយៈពេល ២សប្តាហ៍កំពុងដំណើរការដើម្បីជួយសម្រួលដល់ដំណើរការនេះ។

របាយការណ៍បាននិយាយថា សិក្ខាសាលានេះមានគោលបំណងបើកការចែករំលែកទិន្នន័យគយ ដើម្បីជួយសម្រួលដល់ការបោសសម្អាតទំនិញឆ្លងកាត់ព្រំដែនតាមច្រកព្រំដែន Nacala ដែលជាផ្លូវពាណិជ្ជកម្មដ៏សំខាន់ដែលពាក់ព័ន្ធនឹងបណ្តាញផ្លូវដែក និងផ្លូវគោកប្រទេសម៉ាឡាវី និងហ្សំប៊ី ដើម្បីចូលទៅកាន់កំពង់ផែ Nacala មហាសមុទ្រឥណ្ឌាក្នុងប្រទេសម៉ូសំប៊ិក។

ការរៀបចំនេះ គឺជាផ្នែកមួយនៃគម្រោងពាណិជ្ជកម្ម និងការតភ្ជាប់ប្រទេសអាហ្វ្រិកខាងត្បូង ដែលគាំទ្រដោយធនាគារពិភពលោក។ ជាផ្នែកមួយនៃគំនិតផ្តួចផ្តើម ប៉ុស្តិ៍ច្រកព្រំដែនចេញចូលតែមួយត្រូវបានបង្កើតឡើងរវាងប្រទេសជិតខាង។

លោក កូនេលឺស កាកវីហ្សា (Cornelius Kakweza) ស្នងការគយ និងរដ្ឋាករនៃអាជ្ញាធរចំណូលប្រទេសម៉ាឡាវី បានប្រាប់ប្រព័ន្ធផ្សព្វផ្សាយក្នុងស្រុកថា គំនិតផ្តួចផ្តើមនេះមានសក្តានុពលក្នុងការជំរុញពាណិជ្ជកម្មក្នុងចំណោមប្រទេសទាំង៣ ព្រោះវានឹងមានតម្លៃថោក និងលឿនជាងមុនក្នុងការបោសសម្អាតទំនិញនៅតាមព្រំដែន។

លោក កាកវីហ្សា បាននិយាយថា «តាមរយៈការសម្រួលនីតិវិធី ពាណិជ្ជករនឹងមានការរំពឹងទុកកាន់តែច្បាស់ទាក់ទងនឹងការចំណាយ និងតម្រូវការនៅច្រកព្រំដែន»៕

ដោយ៖ មូល មិនា (ប្រភព៖ ស៊ីនហួ)