AKP ភ្នំពេញ ថ្ងៃទី២០ ខែកុម្ភៈ ឆ្នាំ២០២៥ -- ក្រុមហាម៉ាស់បានអះអាងជាថ្មីអំពីឆន្ទៈរបស់ខ្លួនក្នុងការអនុវត្តដំណាក់កាលទី២ និងទី៣ នៃកិច្ចព្រមព្រៀងបទឈប់បាញ់នៅតំបន់ហ្គាហ្សា។

អ្នកនាំពាក្យក្រុមហាម៉ាស់ លោក ហាហ្សេម កាសសេម (Hazem Qassem) បាននិយាយនៅក្នុងសេចក្តីថ្លែងការណ៍មួយថា ក្រុមបានយល់ព្រមតាមសំណើរបស់អ្នកសម្រុះសម្រួល ដើម្បីបង្កើនចំនួនចំណាប់ខ្មាំងអ៊ីស្រាអែលទ្វេដងដែលត្រូវដោះលែង ដោយបង្ហាញពីការប្តេជ្ញាចិត្តរបស់ខ្លួនចំពោះកិច្ចព្រមព្រៀងនេះ។

លោក កាសសេម បានច្រានចោលការទាមទាររបស់អ៊ីស្រាអែលឱ្យក្រុមហាម៉ាស់ចាកចេញពីតំបន់ហ្គាហ្សា ដោយហៅពួកគេថាជាផ្នែកមួយនៃ «សង្រ្គាមផ្លូវចិត្ត»។ លោកបានសង្កត់ធ្ងន់ថា ក្រុមហាម៉ាស់នឹងមិនទទួលយកការទាមទាររបស់នាយករដ្ឋមន្ត្រីអ៊ីស្រាអែល លោក បេនចាមីន នេតាន់យ៉ាហ៊ូ (Benjamin Netanyahu) ដែលឱ្យក្រុមនេះរំសាយអាវុធ ហើយមេដឹកនាំរបស់ខ្លួនត្រូវបណ្តេញចេញពីតំបន់ហ្គាហ្សានោះទេ។

ដោយឡែក ទូរទស្សន៍សាធារណៈរបស់អ៊ីស្រាអែលបានរាយការណ៍ថា លោក នេតាន់យ៉ាហ៊ូ បានសម្រេចចិត្តជាផ្លូវការដើម្បីចាប់ផ្តើមការចរចាសម្រាប់ដំណាក់កាលទី២ នៃកិច្ចព្រមព្រៀងបទឈប់បាញ់ និងបានជូនដំណឹងដល់គណៈរដ្ឋមន្ត្រីសន្តិសុខអំពីការសម្រេចចិត្តរបស់លោក៕

ដោយ៖ មូល មិនា (ប្រភព៖ ភីបផលដេលី)