AKP ភ្នំពេញ ថ្ងៃទី១៤ ខែកុម្ភៈ ឆ្នាំ២០២៥ -- លោក ដូណាល់ ត្រាំ (Donald Trump) បានសរសេរនៅលើបណ្តាញសង្គមកាលពីថ្ងៃអង្គារថា រដ្ឋមន្ត្រីក្រសួងរតនាគារអាម៉េរិក លោក ស្កុត បេសសិន (Scott Bessent) នឹងធ្វើដំណើរទៅកាន់ប្រទេសអ៊ុយក្រែននៅក្នុងសប្តាហ៍នេះ ខណៈដែលរដ្ឋបាលរបស់លោកព្យាយាមបញ្ចប់សង្រ្គាមរុស្ស៊ី និងអ៊ុយក្រែន និងធានាបាននូវការចូលប្រើប្រាស់ធនធានធម្មជាតិរបស់អាម៉េរិក។

លោក បេសសិន ដែលនឹងក្លាយជាមន្ត្រីថ្នាក់គណៈរដ្ឋមន្ត្រីដំបូងគេក្នុងរដ្ឋបាលរបស់លោក ត្រាំ ដែលទៅបំពេញទស្សនកិច្ចនៅអ៊ុយក្រែននោះគ្រោងនឹងពិភាក្សាអំពីលទ្ធភាពទទួលបានរបស់សហរដ្ឋអាមេរិកចំពោះរ៉ែធនធានថាមពល និងទ្រព្យសម្បត្តិថាមពលរបស់អ៊ុយក្រែន។ នេះបើយោងតាមប្រភពដែលបានដឹងផ្ទាល់អំពីបញ្ហានេះ។ ប្រភពនោះបាននិយាយក្នុងលក្ខខណ្ឌមិនបញ្ចេញឈ្មោះ និងមិនបានផ្តល់ព័ត៌មានលម្អិតបន្ថែមថា អនាគតនៃសហគ្រាសរដ្ឋមួយចំនួនរបស់អ៊ុយក្រែនក៏នឹងត្រូវបានពិភាក្សាផងដែរ។

ទាំងប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskyy) និងលោក ត្រាំ បានសម្តែងចំណាប់អារម្មណ៍ទៅលើកតិកាសញ្ញាមួយ ដែលសហរដ្ឋអាមេរិកនឹងទទួលបានរ៉ែកម្រពីអ៊ុយក្រែនជាថ្នូរនឹងការបន្តគាំទ្រក្នុងការប្រយុទ្ធជាមួយរុស្ស៊ី។

ទីប្រឹក្សាសន្តិសុខជាតិអាម៉េរិកលោក ម៉ៃ វ៉ល់ (Mike Waltz) បាននិយាយនៅក្នុងបទសម្ភាសន៍មួយកាលពីថ្ងៃអាទិត្យថា ទីក្រុងវ៉ាស៊ីនតោនក៏ចាប់អារម្មណ៍ក្នុងការទទួលបានធនធានប្រេង និងឧស្ម័នរបស់អ៊ុយក្រែនជាថ្នូរនឹងការគាំទ្រដល់កិច្ចខិតខំប្រឹងប្រែងសង្គ្រាមរបស់អ៊ុយក្រែនផងដែរ៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)