AKP ភ្នំពេញ ថ្ងៃទី១៣ ខែកុម្ភៈ ឆ្នាំ២០២៥ -- រដ្ឋមន្ត្រីការបរទេសឡាវ លោកថុងសាវ៉ាញ ភុមវិហាន (Thongsavanh Phomvihane) បានជួបប្រជុំតាមប្រព័ន្ធអនឡាញមួយរដ្ឋមន្ត្រីការបរទេសអូស្ត្រាលី លោកស្រី ផេននី វ៉ុង(Penny Wong) ដើម្បីពិភាក្សាអំពីវិធានការពង្រឹងកិច្ចសហប្រតិបត្តិការរវាងប្រទេសទាំងពីរ។

នៅក្នុងកិច្ចប្រជុំមួយកាលពីពេលថ្មីៗនេះ រដ្ឋមន្ត្រីក្រសួងទាំងពីរបានសម្តែងនូវសេចក្តីរីករាយក្នុងការផ្លាស់ប្តូរយោបល់គ្នាដើម្បីពង្រឹង និងពង្រីកទំនាក់ទំនងទ្វេភាគី។

ភាគីទាំងពីរបានទទួលស្គាល់នូវទំនាក់ទំនងមិត្តភាពដ៏យូរអង្វែង និងកិច្ចសហប្រតិបត្តិការប្រកបដោយជោគជ័យរវាងប្រទេសឡាវ និងអូស្ត្រាលីក្នុងរយៈពេល ៧៣ឆ្នាំកន្លងមក ចាប់តាំងពីមានទំនាក់ទំនងការទូត ដែលនាំទៅដល់លទ្ធផលអភិវឌ្ឍន៍ជាវិជ្ជមាន ដែលនៅក្នុង​នោះ​រួម​មានទាំង​ដំណើរ​ទស្សន​កិច្ច​ជា​ផ្លូវ​ការ​នៅ​អូស្ត្រាលី​របស់​នាយក​រដ្ឋ​មន្ត្រី​ឡាវ លោក សុនសាយ ស៊ីផាន់ដូន (Sonxay Siphandone) និង​ធ្វើជាសហ​ប្រធាន​នៃ​កិច្ច​ប្រជុំ​កំពូល​អាស៊ាន-អូស្ត្រាលី ឆ្នាំ​២០២៤ ដើម្បី​ប្រារព្ធ​ខួប​លើក​ទី៥០ នៃ​ទំនាក់​ទំនង​អាស៊ាន-អូស្ត្រាលី។ ប្រទេសទាំងពីរក៏បានធ្វើឱ្យប្រសើរឡើងនូវទំនាក់ទំនងទ្វេភាគីរបស់ពួកគេឱ្យទៅជាភាពជាដៃគូគ្រប់ជ្រុងជ្រោយផងដែរ។

ពួកគេបានព្រមព្រៀងគ្នាបង្កើនកិច្ចសហប្រតិបត្តិការលើវិស័យសំខាន់ៗដែលមានចែងក្នុងផែនការសកម្មភាពភាពជាដៃគូគ្រប់ជ្រុងជ្រោយ ដែលរួមមានការអភិវឌ្ឍធនធានមនុស្ស ពាណិជ្ជកម្ម និងការវិនិយោគការកាត់បន្ថយការប្រែប្រួលអាកាសធាតុ ការអភិវឌ្ឍថាមពលប្រកបដោយចីរភាព សន្តិសុខ ការអនុវត្តច្បាប់ និងវិស័យសំខាន់ៗដទៃទៀត៕

ដោយ៖ យា ចិន្ដាខន្ដី (ប្រភព៖ VNA)