AKP ភ្នំពេញ ថ្ងៃទី១៣ ខែកុម្ភៈ ឆ្នាំ២០២៥ -- ប្រធានាធិបតីឥណ្ឌូណេស៊ីលោក ប្រាបូវ៉ូ ស៊ូប៊ីអាន់តូ (Prabowo Subianto) និងសមភាគីតួកគី លោក រេសេប តាយយីប អឺដូហ្គែន (Recep Tayyip Erdogan) បានជួបពិភាក្សាគ្នាកាលពីថ្ងៃទី១២ ខែកុម្ភៈ នៅទីក្រុងហ្សាការតា ហើយបានចុះហត្ថលេខាលើកិច្ចព្រមព្រៀងជាមួយចំនួនដើម្បីជំរុញទំនាក់ទំនងវិស័យពាណិជ្ជកម្ម និងការពារជាតិរវាងប្រជាជាតិទាំងពីរ។

ថ្លែងមតិបន្ទាប់ពីកិច្ចពិភាក្សានោះ លោក ប្រាបូវ៉ូ បានសង្កត់ធ្ងន់ថា ភាគីទាំងពីរប្តេជ្ញាបង្កើនពាណិជ្ជកម្មរវាងប្រទេសទាំងពីរដែលផ្តល់ផលប្រយោជន៍ទៅវិញទៅមក ហើយបានឯកភាពគ្នាក្នុងការជំរុញការផលិត និងកិច្ចសហប្រតិបត្តិការរួមគ្នានៅក្នុងឧស្សាហកម្មការពារជាតិ។

យោងតាមលោក ប្រាបូវ៉ូ បានឱ្យដឹងថា ភាគីទាំងពីរនឹងធ្វើការហ្វឹកហ្វឺនរួមគ្នាសម្រាប់កងទាហាន និងពង្រឹងកិច្ចសហប្រតិបត្តិការក្នុងការប្រឆាំងភេរវកម្ម និងចារកម្ម។

សម្រាប់ភាគីតួកគី លោក អឺដូហ្គែន បាននិយាយថា ភាគីទាំងពីរបានពិភាក្សាគ្នាអំពីបញ្ហាសកលលោកសំខាន់ៗ រួមទាំងស្ថានការណ៍នៅស៊ីរី និងបញ្ហាប៉ាឡេស្ទីន។ មេដឹកនាំ​ទាំង​ពីរ​បាន​កំណត់​ទិសដៅ​បង្កើន​ពាណិជ្ជកម្ម​ទ្វេភាគី​ឱ្យបានដល់ ​១០​ពាន់​លាន​ដុល្លារអាម៉េរិក​ក្នុង​មួយ​ឆ្នាំ។

យោងតាមក្រសួងពាណិជ្ជកម្មឥណ្ឌូណេស៊ី បានឱ្យដឹងថា ពាណិជ្ជកម្មរវាងប្រទេសទាំងពីរកាលពីឆ្នាំមុនត្រូវបានប៉ាន់ប្រមាណថាមានចំនួន២,៤ពាន់លានដុល្លារអាម៉េរិក។

ក្នុងឱកាសនៃដំណើរទស្សនកិច្ចរបស់មេដឹកនាំតួកគីទៅកាន់ប្រទេសឥណ្ឌូណេស៊ី រដ្ឋមន្ត្រី និងមន្ត្រីនៃប្រទេសទាំងពីរបានចុះហត្ថលេខាលើកិច្ចព្រមព្រៀងជាបន្តបន្ទាប់ ស្តីពីពាណិជ្ជកម្ម ថាមពល ការអប់រំឧត្តមសិក្សានិងសាសនា ដែលរួមបញ្ចូលទាំងកិច្ចព្រមព្រៀងមួយដើម្បីផលិតយន្តហោះគ្មានមនុស្សបើក (UAVs) នៅក្នុងប្រទេសឥណ្ឌូណេស៊ីផងដែរ។

លោក អឺដូហ្គែន កំពុង​បំពេញ​ទស្សនកិច្ច​នៅ​ប្រទេស​ឥណ្ឌូណេស៊ីបន្ទាប់​ពីបំពេញទស្សនកិច្ច​ទៅ​កាន់​ប្រទេស​ម៉ាឡេស៊ី និង​មុន​ពេល​ទៅ​កាន់​ប្រទេស​ប៉ាគីស្ថាន៕

ដោយ៖ យា ចិន្ដាខន្ដី (ប្រភព៖ VNA)