AKP ភ្នំពេញ ថ្ងៃទី១១ ខែកុម្ភៈ ឆ្នាំ២០២៥ -- ក្រុមមន្ត្រីបាននិយាយថា ធុងស្តុកប្រេងមួយនៅភាគអាគ្នេយ៍នៃទីក្រុងអ៊ុលសាន បានផ្ទុះកាលពីថ្ងៃច័ន្ទបណ្តាលឲ្យមនុស្សម្នាក់ស្លាប់ និងម្នាក់ទៀតរងរបួស។

យោងតាមអាជ្ញាធរពន្លត់អគ្គីភ័យ បានឱ្យដឹងថា ការផ្ទុះបានកើតឡើងនៅរោងចក្រមួយក្នុងទីក្រុងអ៊ុលសាន មានចម្ងាយប្រហែល ៣១០គីឡូម៉ែត្រភាគអាគ្នេយ៍នៃទីក្រុងសេអ៊ូល នៅម៉ោង ១១:១៥នាទីព្រឹក។ មនុស្ស​ទាំង​ពីរ​នាក់​ជា​កម្មករ​ដែល​បាន​បើក​ធុង​ដើម្បី​ពិនិត្យ​កម្រិត​សារធាតុ​គីមី​នៅ​ខាង​ក្នុងនា​ពេល​ផ្ទុះ​។

កម្មការិនីម្នាក់ក្នុងវ័យជាង ៣០ឆ្នាំបានសន្លប់ ហើយត្រូវបានបញ្ជូនទៅកាន់មន្ទីរពេទ្យ ជាកន្លែងដែលកម្មការិនីនេះបានទទួលការវះកាត់ ប៉ុន្តែត្រូវបានប្រកាសថាបានស្លាប់នៅពេលរសៀល។ ចំណែក​កម្មករ​ម្នាក់​ទៀត​រង​របួស ប៉ុន្តែ​មិន​មាន​គ្រោះថ្នាក់​ដល់​អាយុ​ជីវិត​ទេ ។

ភ្លើងបានរលត់ទៅវិញបន្ទាប់ពីបានឆាបឆេះប្រហែល ៣ម៉ោង ខណៈដែលអ្នកពន្លត់អគ្គីភ័យជាង ២៣០នាក់ និងសម្ភារៈចំនួន ៤៤ឈុត រួមទាំងម៉ាស៊ីនពន្លត់អគ្គីភ័យត្រូវបានចល័តសម្រាប់កិច្ចខិតខំប្រឹងប្រែងនេះ។ប្រធានាធិបតីស្តីទី លោក ចយ សាងម៉ុក (Choi Sang-mok) បានផ្តល់ការណែនាំជាបន្ទាន់ក្នុងការពង្រាយអ្នកពន្លត់អគ្គីភ័យដែលមានទាំងអស់ដើម្បីពន្លត់ភ្លីង៕

ដោយ៖ មូល មិនា (ប្រភព៖ យ៉ុនហាប់)