AKP ភ្នំពេញ ថ្ងៃទី១១ ខែកុម្ភៈ ឆ្នាំ២០២៥ -- ប្រធានាធិបតីកូឡុំប៊ី លោក ហ្គូស្តាវ៉ូ ផេត្រូ (Gustavo Petro) បានប្រកាសនៅលើវេទិកាសង្គមអ៊ិចថា ការអំពាវនាវរបស់លោកឱ្យលាលែងពីតំណែងរដ្ឋមន្ត្រីរដ្ឋាភិបាល គឺជាផ្នែកមួយនៃកិច្ចខិតខំប្រឹងប្រែងដើម្បីអនុវត្តន៍តាមផែនការអភិវឌ្ឍន៍ជាតិទាំងស្រុង។

លោកប្រធានាធិបតីបានពន្យល់ថា «នឹងមានការផ្លាស់ប្តូរមួយចំនួននៅក្នុងគណៈរដ្ឋមន្ត្រីដើម្បីសម្រេចបាននូវការអនុលោមតាមកម្មវិធីកាន់តែច្រើនដែលសំណូមពរដោយប្រជាជន»។

លោក ផេត្រូ បាននិយាយថា ការផ្លាស់ប្តូរនឹងត្រូវបានធ្វើឡើងដោយសារតែការគ្រប់គ្រងរបស់លោកនឹងបញ្ចប់នៅឆ្នាំ២០២៦ ហើយនឹងផ្តោតទាំងស្រុងលើការបំពេញកម្មវិធីដែលបានផ្តួចផ្តើមនៅដើមអាណត្តិរយៈពេល ៤ឆ្នាំរបស់លោក។

ប្រធានាធិបតី​កូឡុំប៊ី​បាន​រិះគន់​រដ្ឋមន្ត្រី​របស់​លោក​ចំពោះ​ការ​បំពេញ​ការងារ​មិន​បាន​ល្អ​នៅ​ក្នុង​កិច្ច​ប្រជុំ​មួយ​ដែល​បាន​ធ្វើ​ឡើង​កាល​ពី​សប្តាហ៍​មុន។រដ្ឋមន្ត្រីក្រសួងបរិស្ថាន លោកស្រី ស៊ូសាណា មូហាម៉ាដ (Susana Muhamad) រដ្ឋមន្ត្រីក្រសួងវប្បធម៌ លោក ជ័ន ដាវីដ កូរៀ (Juan David Correa) និងរដ្ឋមន្ត្រីក្រសួងការងារ លោក ហ្គ្លូរៀ អ៊ីនេស រ៉ាមីរេហ្ស (Gloria Ines Ramirez) រហូតមកដល់ពេលនេះបានប្រកាសលាលែងពីតំណែង៕

ដោយ៖ មូល មិនា (ប្រភព៖ ស៊ីនហួ)