AKP ភ្នំពេញ ថ្ងៃទី១១ ខែកុម្ភៈ ឆ្នាំ២០២៥ -- ក្រសួងការបរទេសអេហ្ស៊ីបបាននិយាយនៅក្នុងសេចក្តីថ្លែងការណ៍មួយថា ប្រទេសអេហ្ស៊ីបបានប្រកាសថាទីក្រុងគែរនឹងធ្វើជាម្ចាស់ផ្ទះនៃកិច្ចប្រជុំកំពូលអារ៉ាប់ជាបន្ទាន់មួយនៅថ្ងៃទី២៧ខែកុម្ភៈ ដើម្បីដោះស្រាយការវិវឌ្ឍចុងក្រោយបង្អស់ទាក់ទងនឹងបញ្ហាប៉ាឡេស្ទីន និងតំបន់ហ្គាហ្សាស្ទ្រីប។

យោងតាមសេចក្តីថ្លែងការណ៍ បានឱ្យដឹងថា​ កិច្ចប្រជុំកំពូលនេះត្រូវបានសម្រេចធ្វើឡើង បន្ទាប់ពីការពិគ្រោះយោបល់កម្រិតកំពូលរវាងប្រទេសអេហ្ស៊ីបជាមួយបណ្តាប្រទេសអារ៉ាប់ រួមទាំងប៉ាឡេស្ទីន ដែលបានស្នើសុំកិច្ចប្រជុំកំពូល និងការសម្របសម្រួលជាមួយប្រទេសបារ៉ែន ដែលជាប្រធានបច្ចុប្បន្ននៃកិច្ចប្រជុំកំពូលសម្ព័ន្ធអារ៉ាប់ (AL) និងលេខាធិការដ្ឋាន AL ។

សេចក្តីប្រកាសនេះបានធ្វើឡើងបន្ទាប់ពីមានការកត់សម្គាល់ដ៏ចម្រូងចម្រាសរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ដែលស្នើឱ្យមានការផ្លាស់ទីលំនៅរបស់ជនជាតិប៉ាឡេស្ទីនពីតំបន់ហ្គាហ្សាទៅកាន់ប្រទេសជិតខាង រួមទាំងប្រទេសអេហ្ស៊ីបនិងហ្ស៊កដានី។ សំណើនេះត្រូវបានច្រានចោលយ៉ាងទូលំទូលាយទាំងក្នុងតំបន់ និងអន្តរជាតិ។

ក្នុងអំឡុងសន្និសីទសារព័ត៌មានរួមគ្នានៅទីក្រុងវ៉ាស៊ីនតោនជាមួយនាយករដ្ឋមន្ត្រីអ៊ីស្រាអែល លោក បេនចាមីន នេតាន់យ៉ាហ៊ូ (Benjamin Netanyahu) លោក ត្រាំ បាននិយាយថា សហរដ្ឋអាមេរិកគ្រោងនឹងកាន់កាប់តំបន់ហ្គាហ្សា និងអភិវឌ្ឍន៍តំបន់នេះឡើងវិញ បន្ទាប់ពីបានផ្លាស់ប្តូរទីលំនៅប្រជាជនប៉ាឡេស្ទីនរបស់ខ្លួន។

លោក ត្រាំ ធ្លាប់បានលើកឡើងនូវសំណើស្រដៀងគ្នានេះ ដែលទាំងប្រទេសអេហ្ស៊ីប និងហ្ស៊កដានី បានច្រានចោលយ៉ាងច្បាស់លាស់ ដោយបញ្ជាក់ជាថ្មីនូវការប្រឆាំងរបស់ពួកគេចំពោះការផ្លាស់ទីលំនៅដោយបង្ខំណាមួយរបស់ប៉ាឡេស្ទីន៕

ដោយ៖ មូល មិនា (ប្រភព៖ ភីបផលដេលី)