AKP ភ្នំពេញ ថ្ងៃទី១០ ខែកុម្ភៈ ឆ្នាំ២០២៥ -- របាយការណ៍ប្រព័ន្ធផ្សព្វផ្សាយបាននិយាយថា ជនស៊ីវិលរាប់សិបនាក់ត្រូវបានសម្លាប់នៅក្នុងការវាយប្រហារភេរវកម្មដោយក្រុមរដ្ឋឥស្លាមនៅតំបន់ Greater Sahara (ISGS) ជិតទីក្រុងកូបេ ភាគខាងជើងប្រទេសម៉ាលី។

សេចក្តីរាយការណ៍​បាន​និយាយ​ថា សមាជិកជាង ២០០នាក់នៃក្រុមរដ្ឋឥស្លាម ISGS បានវាយប្រហារក្បួនរថយន្តស៊ីវិលដែលអមដោយកងកម្លាំងប្រដាប់អាវុធម៉ាលី បណ្តាលឱ្យមនុស្សស្លាប់ពី ៤៥នាក់ទៅ ៦០នាក់ និងរងរបួសជាច្រើននាក់។ អ្នក​របួស​ត្រូវ​បាន​បញ្ជូន​ទៅ​កាន់​មន្ទីរពេទ្យ​ក្នុង​ទីក្រុង​ក្បែរ​នោះ ។

ក្បួនរថយន្តដែលត្រូវបានវាយប្រហារដោយក្រុមភេរវកររួមមានឡានក្រុងចំនួន ២២គ្រឿង រថយន្តក្រុងធំៗចំនួន ៦គ្រឿង និងរថយន្តដឹកទំនិញចំនួន ៨គ្រឿង ដែលរថយន្តជាច្រើនគ្រឿងត្រូវបានលួច និងដុតបំផ្លាញ។ អាជ្ញាធរ​ម៉ាលី​មិន​ទាន់​ធ្វើ​អត្ថាធិប្បាយ​ជា​ផ្លូវ​ការ​លើ​ការ​វាយ​ប្រហារ​នេះ​ទេ។

ចាប់តាំងពីឆ្នាំ២០១២ មក ប្រទេសម៉ាលីបាននឹងកំពុងប្រឈមមុខនឹងវិបត្តិដ៏ជ្រៅ និងចម្រុះដែលបណ្តាលមកពីការបះបោរបំបែកខ្លួន ការលុកលុយរបស់ក្រុមជីហាដ និងអំពើហិង្សាអន្តរសហគមន៍ ដែលបានសម្លាប់មនុស្សរាប់ពាន់នាក់ និងរាប់សែននាក់បានភៀសខ្លួន៕

ដោយ៖ មូល មិនា (ប្រភព៖ ស៊ីនហួ)