AKP ភ្នំពេញ ថ្ងៃទី០៧ ខែកុម្ភៈ ឆ្នាំ២០២៥ -- អភិបាលតំបន់ប៊ែលហ្គោរ៉ូដ លោក វីយ៉ាឆេស្លេវ ហ្គ្លេដកូវ (Vyacheslav Gladkov) បានរាយការណ៍នៅក្នុងបណ្តាញតេឡក្រាមរបស់លោកថា កងកម្លាំងប្រដាប់អាវុធរបស់ប្រទេសអ៊ុយក្រែនបានទម្លាក់ឧបករណ៍បំផ្ទុះចេញពីយន្តហោះគ្មានមនុស្សបើក (ដ្រូន) ទៅលើរថយន្តមួយគ្រឿងនៅក្នុងភូមិឡូហ្គាឆេវកា ក្នុងសង្កាត់វ៉ាលុយគី នៃតំបន់ប៊ែលហ្គោរ៉ូដ ដោយបានសម្លាប់បុរសម្នាក់ និងក្មេងស្រីជំទង់ ២នាក់។

លោក ហ្គ្លេដកូវ បានសរសេរថា «យោងតាមព័ត៌មានបឋម ដ្រូនបានទម្លាក់ឧបករណ៍បំផ្ទុះទៅលើរថយន្តដឹកអ្នកដំណើរមួយគ្រឿងដែលមានបុរសម្នាក់ និងក្មេងស្រីពីរនាក់អាយុ ១៨ឆ្នាំ និង ១៤ឆ្នាំកំពុងនៅខាងក្នុងនោះ។ ពួកគេបានស្លាប់នៅនឹងកន្លែងភ្លាមៗបន្ទាប់ពីការវាយប្រហារ»។

មន្ត្រីរូបនោះបានរំលឹកថា របបសង្គ្រោះបន្ទាន់បានចូលជាធរមាននៅក្នុងភូមិឡូហ្គាឆេវកា ចាប់តាំងពីថ្ងៃទី២៧ ខែតុលា ឆ្នាំ២០២២ នៅពេលដែលការចូលទៅក្នុងភូមិមួយនេះត្រូវបានហាមឃាត់៕

ដោយ៖ យា ចិន្ដាខន្ដី (ប្រភព៖ តាសស៍)