AKP ភ្នំពេញ ថ្ងៃទី០៧ ខែកុម្ភៈ ឆ្នាំ២០២៥ -- អគ្គសេនាធិការចម្រុះ (JCS) បាននិយាយថា ប្រធានJCS លោក គីម យ៉ុងស៊ូ (Kim Myung-soo) បានចូលរួមវេទិកាសន្តិសុខមួយ ហើយបានលើកឡើងពីសារៈសំខាន់នៃកិច្ចសហប្រតិបត្តិការជាសកលក្នុងការទប់ស្កាត់ និងឆ្លើយតបទៅនឹងការគំរាមកំហែងផ្នែកសន្តិសុខពីប្រទេសកូរ៉េខាងជើង។

យោងតាម ​​JCS បានឱ្យដឹងថា លោក គីម បានធ្វើការកត់សម្គាល់ក្នុងអំឡុងពេលចូលរួមវេទិកាសន្តិសុខឥណ្ឌូ-ប៉ាស៊ីហ្វិកលើកទី៨ ដែលរៀបចំដោយទីបញ្ជាការឥណ្ឌូប៉ាស៊ីហ្វិករបស់សហរដ្ឋអាមេរិក និងមានការចូលរួមពីមន្ត្រីយោធាជាន់ខ្ពស់មកពី ២៦ប្រទេស រួមទាំងប្រទេស     អូស្ត្រាលី និងជប៉ុនផងដែរ។

ក្នុង​ការ​ជួប​ជុំ​ដែល​ធ្វើ​ឡើង​តាម​រយៈ​សន្និសីទ​ទូរគមនាគមន៍ លោក គីម បាន​អំពាវ​នាវ​ឲ្យ​មាន​កិច្ច​សហប្រតិបត្តិការ​ផ្នែក​សន្តិសុខ​កាន់​តែ​ទូលំទូលាយ ដើម្បី​រក្សា​សណ្តាប់​ធ្នាប់​អន្តរជាតិ​ដែល​ផ្អែក​លើ​ច្បាប់។

លោក គីម ត្រូវបានគេដកស្រង់សម្តីថា «ខណៈដែលការគំរាមកំហែងរបស់ប្រទេសកូរ៉េខាងជើង ចាប់ពីការដាក់ពង្រាយកងទ័ពទៅកាន់ប្រទេសរុស្ស៊ី ដល់បច្ចេកវិទ្យា WMD ដែលកំពុងវិវឌ្ឍន៍ និងលេចចេញជាការគំរាមកំហែងជាសាកល កិច្ចសហប្រតិបត្តិការសន្តិសុខនៅក្នុងតំបន់ឥណ្ឌូប៉ាស៊ីហ្វិកគួរតែត្រូវបានពង្រីក ដើម្បីរក្សាសណ្តាប់ធ្នាប់អន្តរជាតិដែលផ្អែកលើច្បាប់»។ បច្ចេកវិទ្យា WMD តំណាងឱ្យអាវុធប្រល័យលោក។

JCS បាននិយាយថា អ្នកចូលរួមក៏បានពិនិត្យឡើងវិញនូវលទ្ធផលនៃកិច្ចប្រជុំប្រធានការពារជាតិក្នុងតំបន់ (CHOD) ដែលបានធ្វើឡើងកាលពីឆ្នាំមុន និងពិភាក្សាអំពីរបៀបវារៈដែលអាចកើតមានសម្រាប់កិច្ចប្រជុំ CHOD ដែលនឹងធ្វើឡើងក្នុងខែសីហានៅប្រទេសថៃ៕

ដោយ៖ មូល មិនា (ប្រភព៖ យ៉ុនហាប់)