AKP ភ្នំពេញ ថ្ងៃទី០៧ ខែកុម្ភៈ ឆ្នាំ២០២៥ -- ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃព្រហស្បតិ៍ថា ក្រុមជម្រើសជាតិកូរ៉េខាងជើងបានធ្វើដំណើរទៅកាន់ទីក្រុងហាប៊ីន ប្រទេសចិន ដើម្បីចូលរួមប្រកួតក្នុងព្រឹត្តិការណ៍ Asian Winter Games នាពេលខាងមុខ។

ទីភ្នាក់ងារសារព័ត៌មានកណ្តាលកូរ៉េ (KCNA) បាននិយាយថា ក្រុមជម្រើសជាតិ រួមជាមួយនឹងគណៈប្រតិភូមកពីគណៈកម្មាធិការអូឡាំពិករបស់ប្រទេសកូរ៉េខាងជើង ដឹកនាំដោយរដ្ឋមន្ត្រីកីឡា និងជាប្រធានគណៈកម្មាធិការ លោក គីម អ៊ីលហ្គុក (Kim Il-guk) បានចាកចេញពីទីក្រុងព្យុងយ៉ាងកាលពីថ្ងៃមុន។

យោងតាមគេហទំព័ររបស់គណៈកម្មាធិការរៀបចំព្រឹត្តិការណ៍នេះ អត្តពលិកកូរ៉េខាងជើងចំនួន ៣នាក់បានចុះឈ្មោះចូលរួមប្រកួតកីឡាស្គីលើទឹកកកគឺ កីឡាករ យ៉ុម តេអ៊ុក (Ryom Tae-ok) និងកីឡាករ ហាន គុមជុល (Han Kum-chol) ក្នុងប្រភេទគូ និងកីឡាករ រ៉ូ យ៉ុងយ៉ុង (Ro Yong-myong) ក្នុងវិញ្ញាសាបុរស។

កីឡាករ យ៉ុម បានឈ្នះមេដាយសំរឹទ្ធសម្រាប់ប្រទេសកូរ៉េខាងជើងជាមួយនឹងអតីតដៃគូគឺ កីឡាករ គីម ជូស៊ីក (Kim Ju-sik) នៅក្នុងព្រឹត្តិការណ៍កីឡាជិះស្គីលើទឹកកកនៅឯព្រឹត្តិការណ៍ Asian Winter Games 2017 ក្នុងទីក្រុងសាបប៉ូរ៉ូ។ កីឡាកររូបនេះក៏បានចូលរួមប្រកួតកីឡា PyeongChang ឆ្នាំ២០១៨ នៅប្រទេសកូរ៉េខាងត្បូង ដោយបានបញ្ចប់ក្នុងចំណាត់ថ្នាក់ទី១៣។

អត្តពលិកកូរ៉េខាងជើងបានចូលរួមប្រកួតលើវិញ្ញាសាជិះស្គីលើទឹកកក និងវិញ្ញាសាខ្លីៗក្នុងព្រឹត្តិការណ៍ Asian Winter Games 2017 ប៉ុន្តែនៅឆ្នាំនេះ ខ្លួនបានបញ្ជូនតែអ្នកជិះស្គីលើទឹកកកដែលជាអនាគតឈ្នះមេដាយប៉ុណ្ណោះ។ ព្រឹត្តិការណ៍ Asian Winter Games ឆ្នាំ២០២៥ គ្រោងនឹងដំណើរការចាប់ពីថ្ងៃសុក្ររហូតដល់ថ្ងៃទី១៤ ខែកុម្ភៈ៕

ដោយ៖ មូល មិនា (ប្រភព៖ យ៉ុនហាប់)