AKP ភ្នំពេញ ថ្ងៃទី០៧ ខែកុម្ភៈ ឆ្នាំ២០២៥ -- យោងតាម​សេវា​សារព័ត៌មាន​របស់​រដ្ឋាភិបាល​កាហ្សាក់ស្ថាន​ បានឱ្យដឹងថា សភាជាន់ទាបរបស់សភាកាហ្សាក់ស្ថានបានផ្តល់សច្ចាប័នលើកិច្ចព្រមព្រៀងរវាងរដ្ឋាភិបាលប្រទេសកាហ្សាក់ស្ថាន និងអ៊ូសបេគីស្ថាន ស្តីពីបទប្បញ្ញត្តិនៃប្រតិបត្តិការនៅមជ្ឈមណ្ឌលសហប្រតិបត្តិការឧស្សាហកម្មអន្តរជាតិអាស៊ីកណ្តាល។

លោក អាម៉ាន់ សាកកាលីយ៉េវ (Arman Shakkaliyev) រដ្ឋមន្ត្រីពាណិជ្ជកម្ម និងសមាហរណកម្មកាហ្សាក់ស្ថាន បាននិយាយថា មជ្ឈមណ្ឌលនេះនឹងជួយពន្លឿនការដឹកជញ្ជូនទំនិញ កាត់បន្ថយថ្លៃដឹកជញ្ជូន សម្រួលខ្សែសង្វាក់ផ្គត់ផ្គង់ដោយកាត់បន្ថយចំនួនអន្តរការី ការចំណាយលើផលិតផលចុងក្រោយទាប បង្កើនល្បឿនដឹកជញ្ជូន និងជំរុញកិច្ចសហប្រតិបត្តិការតាមបណ្តោយច្រករបៀងឆ្លងកាត់ភាគខាងជើង-ភាគខាងត្បូង។

លោក សាកកាលីយ៉េវ បានបន្ថែមថា កិច្ចព្រមព្រៀងនេះបានអនុវត្តន៍ការសម្រេចចិត្តដែលបានធ្វើឡើង បន្ទាប់ពីសម័យប្រជុំលើកទី២០ នៃគណៈកម្មការអន្តររដ្ឋាភិបាលស្តីពីកិច្ចសហប្រតិបត្តិការទ្វេភាគីរវាងប្រទេសកាហ្សាក់ស្ថាន និងអ៊ូសបេគីស្ថាន។

មជ្ឈមណ្ឌល​នេះ​នឹង​ត្រូវ​សាងសង់​នៅ​តំបន់​ព្រំដែន​ក្បែរ​ច្រក​ព្រំដែន​អន្តរជាតិ Gulistan ​ខាងប្រទេសអ៊ូសបេគីស្ថាន និងច្រក​ព្រំដែន Atemeken ​ខាងប្រទេសកាហ្សាក់ស្ថាន។ មជ្ឈមណ្ឌលនេះនឹងរួមបញ្ចូលកន្លែងផលិត ឃ្លាំង និងហេដ្ឋារចនាសម្ព័ន្ធដឹកជញ្ជូន។ ផ្ទៃដីសរុបនៃមជ្ឈមណ្ឌលនឹងមានចំនួន ១០០ហិកតា ដោយ ៥០ហិកតាត្រូវបានបែងចែកទៅប្រទេសកាហ្សាក់ស្ថាន និង៥០ហិកតាទៅប្រទេសអ៊ូសបេគីស្ថាន។

ការបើកដំណើរការបច្ចេកទេសនៃមជ្ឈមណ្ឌលនេះត្រូវបានកំណត់ពេលសម្រាប់ត្រីមាសទី៤ នៃឆ្នាំ២០២៦ ជាមួយនឹងការបើកជាផ្លូវការសម្រាប់ឆមាសទីមួយនៃឆ្នាំ២០២៧។ ក្រសួងពាណិជ្ជកម្ម និងសមាហរណកម្មកាហ្សាក់ស្ថាន នឹងត្រួតពិនិត្យការអនុវត្តគម្រោងនេះរហូតដល់ការបញ្ចប់៕

ដោយ៖ មូល មិនា (ប្រភព៖ ស៊ីនហួ)