AKP ភ្នំពេញ ថ្ងៃទី០៧ ខែកុម្ភៈ ឆ្នាំ២០២៥ -- ប្រធានាធិបតីតួកគី លោក រេសេប តាយយីប អឺដូហ្គាន់ (Recep Tayyip Erdogan) និងប្រធានាធិបតីអាឡឺម៉ង់ លោក ហ្វ្រែង វ៉ាល់ធឺ ស្ទេនមេយអឺ (Frank-Walter Steinmeier) បានរួមគ្នាច្រានចោលសំណើរផ្លាស់ប្តូរជនជាតិប៉ាឡេស្ទីនចេញពីតំបន់ហ្គាហ្សា ដោយបានបញ្ជាក់សារជាថ្មីនូវការគាំទ្ររបស់ពួកគេចំពោះដំណោះស្រាយរដ្ឋពីរដែលផ្ទុយទៅនឹងសំណើថ្មីៗរបស់សហរដ្ឋអាមេរិក។

លោក ស្ទេនមេយអឺ បាននិយាយនៅក្នុងសន្និសីទសារព័ត៌មានរួមនៅទីក្រុងអង់ការ៉ាថា     «សំណើនិរទេសប៉ាឡេស្ទីន ឬនិរទេសជនជាតិប៉ាឡេស្ទីនចេញពីតំបន់ហ្គាហ្សាស្ទ្រីប គឺមិនអាចទទួលយកបាននៅក្រោមច្បាប់អន្តរជាតិ»។ ប្រធានាធិបតីអាល្លឺម៉ង់បានសង្កត់ធ្ងន់លើការបន្តគាំទ្ររបស់ប្រទេសរបស់លោកចំពោះដំណោះស្រាយរដ្ឋពីរ ជាពិសេសនៅក្នុងការពិភាក្សានាពេលអនាគតជាមួយរដ្ឋបាលសហរដ្ឋអាមេរិក។

លោក អឺដូហ្គាន់ បានគូសបញ្ជាក់អំពីការទទួលខុសត្រូវរបស់សហគមន៍អន្តរជាតិក្នុងការរក្សាបទឈប់បាញ់ និងធ្វើការឆ្ពោះទៅរកការអនុវត្តដំណោះស្រាយរដ្ឋពីរ ខណៈដែលមេដឹកនាំទាំងពីរបានពិភាក្សាអំពីកិច្ចសហប្រតិបត្តិការក្នុងតំបន់លើប្រទេសស៊ីរី តំបន់ហ្គាហ្សា និងអ៊ុយក្រែន។

លោក អឺដូហ្គាន់ បាននិយាយថា «ការពិគ្រោះយោបល់ថ្ងៃនេះមានសារៈសំខាន់ណាស់សម្រាប់កិច្ចខិតខំប្រឹងប្រែងរួមគ្នារបស់យើងឆ្ពោះទៅរកសន្តិភាព និងស្ថិរភាពនៅក្នុងតំបន់ជិតខាងរបស់យើង» ដោយលោកបានលើកឡើងពីកិច្ចសហប្រតិបត្តិការដែលកំពុងបន្តរបស់ប្រទេសតួកគីជាមួយប្រទេសអាល្លឺម៉ង់។

ថ្លែងទៅកាន់អនាគតរបស់ប្រទេសស៊ីរី លោក អឺដូហ្គាន់ បានបង្ហាញក្តីសង្ឃឹមសម្រាប់ការគាំទ្ររបស់ប្រទេសអាល្លឺម៉ង់ក្នុងកិច្ចខិតខំប្រឹងប្រែងកសាងឡើងវិញ ខណៈដែលលោក ស្ទេនមេយអឺ បានទទួលស្គាល់សារៈសំខាន់ជាយុទ្ធសាស្រ្តរបស់ប្រទេសតួកគីក្នុងការធានានូវសន្តិភាពក្នុងតំបន់។

មេដឹកនាំទាំងពីរក៏បានពិភាក្សាអំពីជម្លោះអ៊ុយក្រែនផងដែរ ដោយលោក អឺដូហ្គាន់ បានរំលឹកឡើងវិញនូវការអំពាវនាវដ៏យូរអង្វែងរបស់លោកសម្រាប់ «សន្តិភាពដ៏ត្រឹមត្រូវ និងយូរអង្វែង»៕

ដោយ៖ មូល មិនា (ប្រភព៖ ភីបផលដេលី)