AKP ភ្នំពេញ ថ្ងៃទី០៦ ខែកុម្ភៈ ឆ្នាំ២០២៥ -- សហព័ន្ធសភាពាណិជ្ជកម្ម និងឧស្សាហកម្មអេមីរ៉ាត់អារ៉ាប់រួម (FCCI) បានរៀបចំកិច្ចប្រជុំលើកដំបូងនៃក្រុមប្រឹក្សាធុរកិច្ចរួមអេមីរ៉ាត់អារ៉ាប់រួម-គៀហ្សីស្ថាន។

កិច្ចប្រជុំនេះធ្វើឡើងដោយសហការជាមួយសភាពាណិជ្ជកម្ម និងឧស្សាហកម្ម Sharjah (SCCI) ក្នុងគោលបំណងពង្រឹងទំនាក់ទំនងសេដ្ឋកិច្ចនិងពាណិជ្ជកម្មរវាងអេមីរ៉ាត់អារ៉ាប់រួម និងសាធារណៈរដ្ឋគៀហ្ស៊ីស្ថានព្រមទាំងដើម្បីបង្កើនកិច្ចសហប្រតិបត្តិការរវាងវិស័យឯកជនរបស់ប្រទេសទាំងពីរផងដែរ។

កិច្ចប្រជុំនេះដឹកនាំដោយលោក អាប់ឌុលឡាហ៍ ស៊ុលតង់ អាល់ អូវែស(Abdallah Sultan Al Owais) អនុប្រធានសហព័ន្ធសភាពាណិជ្ជកម្ម និងឧស្សាហកម្មអេមីរ៉ាត់អារ៉ប់រួម និងប្រធានជា SCCI ដោយមានការចូលរួមពីលោក ណាតែវ ន័រលេន វីក (Nartaev Nurlan Vic) អនុប្រធានសភាពាណិជ្ជកម្ម និងឧស្សាហកម្មនៃសាធារណៈរដ្ឋគៀហ្ស៊ីស្ថាន។

កិច្ចប្រជុំនេះមានការចូលរួមដោយលោក ម៉ូហាំម៉េដ អាម៉េដ អាមីន អាល់ អាវ៉ាឌី (Mohammed Ahmed Amin Al Awadi) អគ្គនាយក SCCIលោក អាម៉េដ អាល់ កៃហ្ស៊ី (Ahmed Al Qaizi) ជំនួយការអគ្គលេខាធិការFCCI និងលោក ហ្វាតេម៉ា ខាលីហ្វា អាល់ មូការ៉ាប់ (Fatema Khalifa Al Muqarrab) នាយកទំនាក់ទំនងអន្តរជាតិនៃ SCCI ក៏ដូចជាអ្នកដឹកនាំធុរកិច្ចនិងសហគ្រិនមកពីប្រទេសទាំងពីរដែលតំណាងឱ្យវិស័យសំខាន់ៗរួមមានវិស័យបច្ចេកវិទ្យាកសិកម្ម ថាមពល ការផលិត ការថែទាំសុខភាពនិងទេសចរណ៍។

កិច្ចប្រជុំក្រុមប្រឹក្សាធុរកិច្ចរួមអេមីរ៉ាត់អារ៉ាប់រួម-គៀហ្ស៊ីស្ថាន មានបទបង្ហាញអំពីយន្តការប្រតិបត្តិការរបស់ក្រុមប្រឹក្សា ដោយលើកឡើងអំពីសារៈសំខាន់នៃគណៈប្រតិភូពាណិជ្ជកម្មទៅវិញទៅមក និងការពង្រីកកិច្ចសហប្រតិបត្តិការដើម្បីរួមបញ្ចូលវិស័យចម្រុះដែលអនុញ្ញាតឱ្យមានភាពបត់បែនក្នុងប្រតិបត្តិការរបស់ក្រុមប្រឹក្សាដើម្បីសម្រេចបាននូវគោលបំណងរបស់ខ្លួន៕

ដោយ៖ យា ចិន្ដាខន្ដី (ប្រភព៖ ANI)