AKP ភ្នំពេញ ថ្ងៃទី០៥ ខែកុម្ភៈ ឆ្នាំ២០២៥ -- ប្រទេសកូរ៉េខាងជើងបានរិះគន់ផែនការរបស់រដ្ឋបាល លោក ដូណាល់ ត្រាំ (Donald Trump) ដើម្បីបង្កើនការការពារមីស៊ីលសម្រាប់ទឹកដីសម្ព័ន្ធមិត្ត ដោយប្តេជ្ញាថានឹងជំរុញការទប់ស្កាត់នុយក្លេអ៊ែរ និងសមត្ថភាពយោធាផ្សេងទៀតក្នុងការការពារខ្លួន។

វិទ្យាស្ថានសម្រាប់ការរំសាយអាវុធ និងសន្តិភាពរបស់ក្រសួងការបរទេសកូរ៉េខាងជើង បានចេញការរិះគន់នៅក្នុងសេចក្តីថ្លែងការណ៍មួយបន្ទាប់ពីបទបញ្ជារបស់ប្រធានាធិបតីលោក ត្រាំ កាលពីសប្តាហ៍មុន ដើម្បីបន្តនូវខែលការពារមីស៊ីល «ជំនាន់ក្រោយ» សម្រាប់សហរដ្ឋអាមេរិក និងទឹកដីសម្ព័ន្ធមិត្ត។

វិទ្យាស្ថាននេះបានអះអាងនៅក្នុងសេចក្តីថ្លែងការណ៍ដែលបានរាយការណ៍ដោយទីភ្នាក់ងារសារព័ត៌មានកណ្តាលកូរ៉េ (KCNA) ថាផែនការនេះបានបង្ហាញពីការបង្កើនល្បឿនដ៏មានសក្តានុពលនៃទំនើបកម្មប្រព័ន្ធការពារមីស៊ីលរបស់សហរដ្ឋអាមេរិកនៅក្នុងតំបន់អាស៊ីប៉ាស៊ីហ្វិកដែលជាទីតាំងរបស់មហាអំណាចនុយក្លេអ៊ែរ។

វិទ្យាស្ថានក៏បានអះអាងផងដែរថា ជាក់ស្តែង សហរដ្ឋអាមេរិកនឹងពន្លឿនការអភិវឌ្ឍរួមគ្នានៃប្រព័ន្ធមួយ ដើម្បីស្ទាក់ចាប់មីស៊ីលលឿនជាងសំឡេងជាមួយប្រទេសជប៉ុន និងសម្ព័ន្ធមិត្តផ្សេងទៀត ហើយដាក់ពង្រាយប្រព័ន្ធការពារបច្ចេកវិទ្យាខ្ពស់បន្ថែមទៀតនៅក្នុងប្រទេសកូរ៉េខាងត្បូងដូចជាស្ថានីយការពារតំបន់រយៈកម្ពស់ខ្ពស់ (THAAD) ជាដើម។

វិទ្យាស្ថាននេះបានចោទប្រកាន់សហរដ្ឋអាមេរិកថាកំពុងពន្លឿនការស្វែងរកអនុត្តរភាពយោធារបស់ខ្លួន ដោយវិទ្យាស្ថានបាននិយាយថាខ្លួនបានធានាក្នុងការបន្តអភិវឌ្ឍសមត្ថភាពស្វ័យការពាររបស់ប្រទេសកូរ៉េខាងជើងដែលត្រូវបានបោះយុថ្កាក្នុងការទប់ស្កាត់នុយក្លេអ៊ែរ។កូរ៉េខាងជើង «នឹងឆ្លើយតបចំពោះការពង្រឹងសមត្ថភាពយោធារបស់ខ្លួនដោយគ្មានដែនកំណត់ ដើម្បីឆ្លើយតបទៅនឹងការបង្កើនល្បឿនការគំរាមកំហែងផ្នែកយោធាពីកងកម្លាំងអរិភាព»៕

ដោយ៖ មូល មិនា (ប្រភព៖ យ៉ុនហាប់)