AKP ភ្នំពេញ ថ្ងៃទី០៥ ខែកុម្ភៈ ឆ្នាំ២០២៥ -- ទីភ្នាក់ងារសារព័ត៌មានរដ្ឋWAFA បានរាយការណ៍ថា នាយករដ្ឋមន្ត្រីប៉ាឡេស្ទីន លោក ម៉ូហាមម៉ាដ មូស្តាហ្វា (Mohammad Mustafa) បានប្រកាសកាលពីថ្ងៃអង្គារ អំពីការបង្កើតគណៈកម្មាធិការការងារមួយដើម្បីគ្រប់គ្រងកិច្ចការនៅតំបន់ហ្គាហ្សាស្ទ្រីប តាមការណែនាំរបស់ប្រធានាធិបតី លោក ម៉ាហ៍មូដ អាប់បាស(Mahmoud Abbas) ។

លោក មូស្ដាហ្វា បាននិយាយក្នុងអំឡុងសម័យប្រជុំគណៈរដ្ឋមន្ត្រីប្រចាំសប្តាហ៍នៅទីក្រុង រ៉ាម៉ាល់ឡាហ៍ថា ការផ្លាស់ប្តូរនេះមានគោលបំណងបញ្ជាក់ពី «ការរួបរួមនៃទឹកដីរបស់រដ្ឋប៉ាឡេស្ទីន» និងពង្រឹងការរួបរួមជាតិ។លោកបានបន្ថែមថា គណៈកម្មាធិការនឹងសម្របសម្រួលការផ្តល់ជំនួយមនុស្សធម៌ បោសសម្អាតកម្ទេចកម្ទី បើកចំហ និងបង្កើតជម្រកបណ្តោះអាសន្នសម្រាប់ជនភៀសខ្លួន មុនពេលកិច្ចខិតខំប្រឹងប្រែងកសាងឡើងវិញកាន់តែទូលំទូលាយ។

លោក មូស្ដាហ្វា បានសង្កត់ធ្ងន់លើការយកចិត្តទុកដាក់របស់រដ្ឋាភិបាលចំពោះការស្ដារឡើងវិញនូវសេវាមូលដ្ឋាន រួមទាំងប្រព័ន្ធទឹកអគ្គិសនី ការថែទាំសុខភាព និងការអប់រំ ហើយមានបន្ទប់ប្រតិបត្តិការសង្គ្រោះបន្ទាន់មួយនៅក្នុងខេត្តភាគខាងត្បូងនៃតំបន់ហ្គាហ្សា។ លោកបាននិយាយថា«ការទទួលខុសត្រូវជាតិបានបង្ខំយើងឱ្យគាំទ្រប្រជាជនរបស់យើងដែលបានស៊ូទ្រាំនឹងភាពរន្ធត់នៃសង្គ្រាមរយៈពេល ១៥ខែ»។

ការ​ប្រកាស​នេះ​ធ្វើ​ឡើង​ប៉ុន្មាន​ថ្ងៃ​បន្ទាប់​ពី​ការិយាល័យ​ប្រព័ន្ធ​ផ្សព្វផ្សាយ​រដ្ឋាភិបាល​ដែល​គ្រប់គ្រង​ដោយ​ក្រុម​ហាម៉ាស់​ ក្នុង​តំបន់​ហ្គាហ្សា​បាន​ប៉ាន់​ប្រមាណចំពោះការ​ខាត​បង់​ដោយផ្ទាល់​ពី​ការ​វាយប្រហារ​របស់​យោធា​អ៊ីស្រាអែល​ចំនួន​ជាង ៥០ប៊ី​លាន​ដុល្លារ​អាម៉េរិក​ចំពោះ​ហេដ្ឋារចនាសម្ព័ន្ធ និងវិស័យសេដ្ឋកិច្ច។

លោក មូស្ដាហ្វា បាននិយាយថា ផែនការកសាងឡើងវិញនឹងត្រូវបានសម្របសម្រួលជាមួយប្រទេសអេហ្ស៊ីប ដែលមានព្រំប្រទល់ជាប់តំបន់ហ្គាហ្សា និងបានសម្រុះសម្រួលគ្នារវាងក្រុមហាម៉ាស់ និងអ៊ីស្រាអែលដោយប្រទេសកាតា និងសហរដ្ឋអាមេរិក៕

ដោយ៖ មូល មិនា (ប្រភព៖ ភីបផលដេលី)