AKP ភ្នំពេញ ថ្ងៃទី០៤ ខែកុម្ភៈ ឆ្នាំ២០២៥ -- កងយន្តហោះចម្បាំងទី៥១ របស់សហរដ្ឋអាមេរិកបាននិយាយកាលពីថ្ងៃចន្ទថា បុគ្គលិកកងទ័ពអាកាសសហរដ្ឋអាមេរិកដែលឈរជើងនៅក្នុងប្រទេសកូរ៉េខាងត្បូង បានចូលរួមក្នុងសមយុទ្ធមូលដ្ឋានទ័ពអាកាសកាលពីសប្តាហ៍មុនដើម្បីពង្រឹងការត្រៀមខ្លួនរបស់ពួកគេ បើទោះបីជាមានព្រិលធ្លាក់ខ្លាំងដែលបានគ្របដណ្តប់ក្នុងប្រទេសជាច្រើនក៏ដោយ។

យោងតាមអង្គភាពដែលមានមូលដ្ឋាននៅក្នុងមូលដ្ឋានអាកាស Osanក្នុងទីក្រុងព្យុងតេក មានចម្ងាយ ៦០គីឡូម៉ែត្រភាគខាងត្បូងទីក្រុងសេអ៊ូលបានឱ្យដឹងថា សមយុទ្ធបេវឺលី ហឺដ (Beverly Herd) រយៈពេល ៦ថ្ងៃបានបញ្ចប់កាលពីថ្ងៃសុក្រ ខណៈដែលព្រិលបានជះឥទ្ធិពលយ៉ាងខ្លាំងដល់ផ្នែកជាច្រើននៃប្រទេសក្នុងអំឡុងពេលថ្ងៃឈប់សម្រាកបុណ្យចូលឆ្នាំចិន។

ក្នុងអំឡុងពេលសមយុទ្ធនេះ បុគ្គលិកមូលដ្ឋានបានហ្វឹកហាត់ក្នុងការគ្រប់គ្រងអាវុធ យុទ្ធសាស្ត្រអង្គភាពតូច និងការបាញ់បង្ហោះយន្តហោះប្រយុទ្ធយ៉ាងឆាប់រហ័ស។ អង្គភាពនេះក៏បានអនុវត្តន៍ការដាក់ពង្រាយយន្តហោះប្រយុទ្ធដើម្បីគាំទ្រដល់សមយុទ្ធ ដោយបានបញ្ជូនយន្តហោះចម្បាំង F-16 ចេញប្រតិបត្តិការពីមូលដ្ឋានអាកាស Kunsan ។

អង្គភាពបាននិយាយថា ដោយសារតែព្រិលធ្លាក់ខ្លាំង បុគ្គលិកទាំងអស់បានធ្វើការប្រតិបត្តិការ ២៤ម៉ោង ដើម្បីរក្សាអាកាសយានដ្ឋានឱ្យបើកចំហរនិងគាំទ្រទាំងការធ្វើលំហាត់ប្រាណ និងប្រតិបត្តិការជាក់ស្តែង។ មូលដ្ឋានទ័ពអាកាស Osan មានព្រិលសរុប ២៣សង់ទីម៉ែត្រក្នុងអំឡុងពេលនេះ ខណៈដែលមូលដ្ឋានអាកាស Kunsan នៅទីក្រុងហ្គុនសាន មានចម្ងាយ១៧៦គីឡូម៉ែត្រភាគខាងត្បូងទីក្រុងសេអ៊ូល បានកត់ត្រាប្រហែល១៣សង់ទីម៉ែត្រ។

លោក វីល្លាម មេកគីបបាន (William McKibban) មេបញ្ជាការកងយន្តហោះចម្បាំងទី៥១ បាននិយាយនៅក្នុងការចេញផ្សាយថា «ចំណុចទាំងមូលនៃលំហាត់បែបនេះ គឺរៀបចំដើម្បីកងទ័ពអាកាសរបស់យើងក្នុងការបង្កើតកម្លាំងទ័ពអាកាសប្រយុទ្ធក្រោមលក្ខខណ្ឌណាមួយ រួមទាំងពេលរងការវាយប្រហារ និងមានព្រិលធ្លាក់ ឬលក្ខខណ្ឌទាំងពីរ»៕

ដោយ៖ មូល មិនា (ប្រភព៖ យ៉ុនហាប់)