AKP ភ្នំពេញ ថ្ងៃទី០៣ ខែកុម្ភៈ ឆ្នាំ២០២៥ -- ប្រទេសអេហ្ស៊ីប ហ្ស៊កដានី អារ៉ាប៊ីសាអូឌីត កាតា អេមីរ៉ាតអារ៉ាប់រួម (UAE) អាជ្ញាធរប៉ាឡេស្ទីន (PA) និងសម្ព័ន្ធអារ៉ាប់ (AL) បានសង្កត់ធ្ងន់នៅក្នុងសេចក្តីថ្លែងការណ៍រួមមួយពីការបដិសេធចំពោះការប៉ុនប៉ងណាមួយដើម្បីផ្លាស់ទីលំនៅប្រជាជនប៉ាឡេស្ទីនចេញពីតំបន់ហ្គាហ្សាស្ទ្រីប និងតំបន់វេសប៊ែង។

សេចក្តីថ្លែងការណ៍នេះត្រូវបានចេញបន្ទាប់ពីកិច្ចប្រជុំមួយនៅក្នុងទីក្រុងគែរ នៃប្រទេសអេហ្ស៊ីប ដោយមានការចូលរួមដោយអ្នកការទូតកំពូលមកពីប្រទេសអេហ្ស៊ីប ហ្ស៊កដានី អារ៉ាប៊ីសាអូឌីត កាតា និង UAE ក៏ដូចជាមន្ត្រីជាន់ខ្ពស់មកពីអាជ្ញាធរ PA និងសម្ព័ន្ធ AL ។

យោងតាមសេចក្តីថ្លែងការណ៍ បានឱ្យដឹងថា អ្នកចូលរួមនៃកិច្ចប្រជុំបានសម្តែងការប្តេជ្ញាចិត្តក្នុងការធ្វើការជាមួយរដ្ឋបាលរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) «ដើម្បីសម្រេចបាននូវសន្តិភាពដ៏ត្រឹមត្រូវ និងទូលំទូលាយនៅតំបន់មជ្ឈិមបូព៌ាដោយផ្អែកលើដំណោះស្រាយរដ្ឋពីរ»។

ពួកគេក៏បានសម្តែងការគាំទ្រយ៉ាងពេញទំហឹងចំពោះរដ្ឋប៉ាឡេស្ទីននិងសិទ្ធិស្របច្បាប់របស់ពួកគេ ដោយបដិសេធរាល់ការប៉ុនប៉ងដើម្បីផ្លាស់ទីលំនៅប្រជាជនប៉ាឡេស្ទីន ទោះបីជាដោយការបណ្តេញចេញ ឬការប្រឹងប្រែងដើម្បីផ្ទេរ ឬដកពួកគេចេញពីទឹកដីក្នុងកាលៈទេសៈណាក៏ដោយ។

សេចក្តីថ្លែងការណ៍ក៏បានជំរុញឱ្យសហគមន៍អន្តរជាតិសម្របសម្រួលកិច្ចខិតខំប្រឹងប្រែងសម្រាប់ការរៀបចំផែនការ និងអនុវត្តន៍ដំណើរការដ៏ទូលំទូលាយមួយសម្រាប់ការកសាងឡើងវិញនូវតំបន់ហ្គាហ្សា ហើយកែលម្អជីវភាពរស់នៅប្រចាំថ្ងៃរបស់ប៉ាឡេស្ទីន និងដោះស្រាយបញ្ហានៃការផ្លាស់ទីលំនៅផ្ទៃក្នុង៕

ដោយ៖ មូល មិនា (ប្រភព៖ ភីបផលដេលី)