AKP ភ្នំពេញ ថ្ងៃទី០៣ ខែកុម្ភៈ ឆ្នាំ២០២៥ -- នាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ (Benjamin Netanyahu) ធ្វើដំណើរទៅកាន់សហរដ្ឋអាមេរិកនៅថ្ងៃទី០២ ខែកុម្ភៈ ដើម្បីពិភាក្សាអំពីដំណាក់កាលបន្ទាប់នៃកិច្ចព្រមព្រៀងដោះដូរចំណាប់ខ្មាំងនៅតំបន់ហ្គាហ្សា ជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump)។នេះបើយោងតាមទីប្រឹក្សារបស់លោក ណេតាន់យ៉ាហ៊ូ លោក ឌីមីទ្រី ហ្គេនឌែលមេន (Dmitri Gendelman) បានប្រាប់សារព័ត៌មានតាសស៍ (TASS)។

លោកបាននិយាយថា «លោកនាយករដ្ឋមន្រ្តី [អ៊ីស្រាអែល] ហោះទៅសហរដ្ឋអាមេរិកនៅថ្ងៃទី០២ ខែកុម្ភៈសម្រាប់កិច្ចប្រជុំជាមួយលោក ដូណាល់ ត្រាំ។ បញ្ហាមួយចំនួននឹងត្រូវបានពិភាក្សា រួមទាំងដំណាក់កាលបន្ទាប់នៃកិច្ចព្រមព្រៀង [តំបន់ហ្គាហ្សា]»។

ការិយាល័យរបស់លោក ណេតាន់យ៉ាហ៊ូ បានបញ្ជាក់កាលពីថ្ងៃទី០១ ខែកុម្ភៈ ថា «លោកនាយករដ្ឋមន្ត្រីនឹងធ្វើដំណើរទៅកាន់សហរដ្ឋអាមេរិកដើម្បីជួបជាមួយលោកប្រធានាធិបតី ដូណាល់ ត្រាំ នៅថ្ងៃស្អែក (ថ្ងៃទី០២ខែកុម្ភៈ)»។ ការិយាល័យនោះបាននិយាយថា «នៅក្នុងកិច្ចប្រជុំជាប្រវត្តិសាស្ត្រនោះ មេដឹកនាំទាំងពីរនឹងពិភាក្សាគ្នាអំពីស្ថានភាពនៅតំបន់ហ្គាហ្សា បញ្ហាដោះដូរចំណាប់ខ្មាំង និងបញ្ហាសំខាន់ៗផ្សេងៗទៀត»។

ការិយាល័យរបស់នាយករដ្ឋមន្ត្រីអ៊ីស្រាអែលបានប្រកាសកាលពីថ្ងៃទី២៨ ខែមករាថា លោក ត្រាំ បានអញ្ជើញលោក ណេតាន់យ៉ាហ៊ូ ឱ្យចូលរួមកិច្ចប្រជុំនៅសេតវិមាននៅថ្ងៃទី០៤ ខែកុម្ភៈ។ លោក ណេតាន់យ៉ាហ៊ូនឹងក្លាយជាមេដឹកនាំបរទេសដំបូងគេដែលត្រូវបានអញ្ជើញឱ្យទៅសេតវិមានក្នុងអំឡុងពេលដែលលោក ដូណាល់ ត្រាំ កាន់តំណែងជាប្រធានាធិបតីលើកទីពីរ»៕

ដោយ៖ យា ចិន្ដាខន្ដី (ប្រភព៖ តាសស៍)