AKP ភ្នំពេញ ថ្ងៃទី៣១ ខែមករា ឆ្នាំ២០២៥ -- ក្រុមតស៊ូប៉ាឡេស្ទីនហាម៉ាស់បានដោះលែងចំណាប់ខ្មាំងជនជាតិអ៊ីស្រាអែល ៣នាក់បន្ថែមទៀតនៅតំបន់ហ្គាហ្សាកាលពីថ្ងៃព្រហស្បតិ៍ ក្រោមកិច្ចព្រមព្រៀងបទឈប់បាញ់ជាមួយអ៊ីស្រាអែល។

ទាហានស្រីឈ្មោះ អាហ្កាម បឺហ្គើរ (Agam Berger) ត្រូវបានប្រគល់ទៅឱ្យអ្នកតំណាងគណៈកម្មាធិការអន្តរជាតិកាកបាទក្រហមនៅតំបន់អាល់-រ៉ាហ្សាន់ (Al-Razan) ក្នុងជំរុំជនភៀសខ្លួនចាបាលីយ៉ានៅភាគខាងជើងតំបន់ហ្គាហ្សា។ នេះបើយោងតាមអ្នកសារព័ត៌មានអាណាដូលូ។

ឈ្លើយសឹកចំនួន ២នាក់ទៀត គឺលោក អាប៊ែល យ៉េហ៊ុដ (Arbel Yehud) ​និងលោក ហ្គាឌី ម៉ូហ្សេស (Gadi Mozes) ក៏ត្រូវបានដោះលែងហើយប្រគល់ទៅឱ្យកាកបាទក្រហមនៅទីក្រុងខាន់យូនីសនៅភាគខាងត្បូងដែរ។

កងទ័ព​អ៊ីស្រាអែល​បាន​បញ្ជាក់​ថា ខ្លួន​បាន​ទទួល​ឈ្លើយសឹក​ទាំង៧នាក់ ហើយ​ពួកគេ​ត្រូវ​បាន​ផ្ទេរ​ទៅ​អ៊ីស្រាអែល។

យោធា​បាន​បញ្ជាក់នៅពេលមុននេះ​ថា លោកស្រី បឺហ្គើរ ត្រូវ​បាន​ដោះលែង និង​ផ្ទេរ​ទៅ​អ៊ីស្រាអែល​ដើម្បី​ពិនិត្យ​សុខភាព។

នៅទីក្រុងខាន់យូនីស ប្រជាជនប៉ាឡេស្ទីនរាប់ពាន់នាក់បានប្រមូលផ្តុំគ្នានៅកន្លែងបញ្ជូនចំណាប់ខ្មាំងជនជាតិអ៊ីស្រាអែលពីរនាក់ ដោយបានរំខាន និងពន្យារពេលការប្រគល់ចំណាប់ខ្មាំងនោះ៕

ដោយ៖ យា ចិន្ដាខន្ដី (ប្រភព៖ AA-AKP)