AKP ភ្នំពេញ ថ្ងៃទី៣០ ខែមករា ឆ្នាំ២០២៥ -- មេដឹកនាំកូរ៉េខាងជើង លោក គីម ជុងអ៊ុន (Kim Jong-un) បានត្រួតពិនិត្យមូលដ្ឋានផលិតសម្ភារៈនុយក្លេអ៊ែរ និងវិទ្យាស្ថានអាវុធនុយក្លេអ៊ែរ ដោយលោកបានសង្កត់ធ្ងន់ថា ការពង្រឹងខែលនុយក្លេអ៊ែរគឺ «មិនអាចខ្វះបាន» ចំពេលមានការប្រឈមមុខគ្នាយូរអង្វែងជាមួយ «ប្រទេសដែលមានអរិភាពដ៏សាហាវបំផុត»។

ទីភ្នាក់ងារសារព័ត៌មានកណ្តាលកូរ៉េ (KCNA) បាននិយាយកាលពីថ្ងៃពុធថា លោក គីម បានធ្វើការកត់សម្គាល់ក្នុងអំឡុងពេលត្រួតពិនិត្យមូលដ្ឋានផលិតកម្ម និងវិទ្យាស្ថានអាវុធនុយក្លេអ៊ែរ ជាកន្លែងដែលលោកបានពិនិត្យមើលដំណើរការស្នូលសម្រាប់ការផលិតសម្ភារនុយក្លេអ៊ែរ និងបានសិក្សាអំពីស្ថានភាពផលិតកម្មនាពេលបច្ចុប្បន្ន។

ទីភ្នាក់ងារ KCNA បាន​ដក​ស្រង់​សម្ដី​លោក គីម ថា ស្ថានភាពសន្តិសុខរបស់ប្រទេសកូរ៉េខាងជើង ដែលក្នុងនោះមាន «ការប្រឈមមុខគ្នារយៈពេលវែងជាមួយប្រទេសអរិភាពដ៏កាចសាហាវបំផុត គឺជៀសមិនរួច» ធ្វើឱ្យវា «មិនអាចខ្វះបាន» សម្រាប់ប្រទេសនេះក្នុងការពង្រឹងខែលនុយក្លេអ៊ែរជាលំដាប់ ដើម្បីទប់ទល់នឹងគ្រោះថ្នាក់សន្តិសុខដែលមានស្រាប់ និងថ្មីៗ និងធានាអធិបតេយ្យភាព ផលប្រយោជន៍ និងសិទ្ធិអភិវឌ្ឍន៍របស់ខ្លួន ។

លោកបាននិយាយថា ស្ថានភាពខាងក្រៅដែលប្រឈមមុខនឹងប្រទេសកូរ៉េខាងជើង «នៅតែធ្ងន់ធ្ងរ ហើយបញ្ហាប្រឈមនៃកងកម្លាំងអរិភាពកាន់តែមានភាពច្បាស់លាស់» លោកបានបន្ថែមថា ការស្តុកទុកអាវុធនុយក្លេអ៊ែរ និងការកើនឡើងរបស់វាបានពង្រឹងសមត្ថភាពទប់ទល់នឹងសត្រូវរបស់ប្រទេសកូរ៉េខាងជើងយ៉ាងហ្មត់ចត់។

មេដឹកនាំរូបនេះបាននិយាយថា កងកម្លាំងបច្ចេកទេសនុយក្លេអ៊ែររបស់ប្រទេសកំពុងកើនឡើងកាន់តែខ្លាំងពីមួយថ្ងៃទៅមួយថ្ងៃ ដោយលោកបានបញ្ជាក់ថា «ការធានាសន្តិភាព និងសន្តិសុខដោយកម្លាំងខ្សោយ គឺជារបៀបនៃការតស៊ូ និងជម្រើសរបស់យើង»។ លោកក៏បានបញ្ជាឱ្យបំពេញផែនការផលិតអាវុធនុយក្លេអ៊ែរ និងពង្រឹងខែលនុយក្លេអ៊ែររបស់ប្រទេសផងដែរ៕

ដោយ៖ មូល មិនា (ប្រភព៖ យ៉ុនហាប់)