AKP ភ្នំពេញ ថ្ងៃទី៣០ ខែមករា ឆ្នាំ២០២៥ -- អ្នកនាំពាក្យអង្គការសហប្រជាជាតិបាននិយាយថា អគ្គលេខាធិការអង្គការសហប្រជាជាតិ លោក អានតូញ៉ូ ហ្គូធឺរេស (Antonio Guterres) បានពិភាក្សាតាមទូរស័ព្ទជាមួយប្រធានាធិបតីនៃសាធារណរដ្ឋប្រជាធិបតេយ្យកុងហ្គោ (DRC) និងប្រទេសរវ៉ាន់ដា ដើម្បីពិភាក្សាអំពីជម្លោះដែលកំពុងកើនឡើងនៅក្នុងប្រទេសកុងហ្គោ។

លោក ស្តេហ្វាន ឌូចារីក (Stephane Dujarric) ប្រធានអ្នកនាំពាក្យរបស់អគ្គលេខាធិការអង្គការសហប្រជាជាតិបានឆ្លើយតបនៅក្នុងសន្និសីទសង្ខេបមួយថា «អគ្គលេខាធិការបានពិភាក្សាយ៉ាងច្បាស់អំពីស្ថានភាពនៅក្នុងប្រទេសកុងហ្គោ ហើយលោកដឹងច្បាស់ណាស់ទាំងវិស័យ     សាធារណៈ និងឯកជនសម្រាប់តម្រូវការរបស់ប្រទេសរវ៉ាន់ដា ដើម្បីបញ្ឈប់ការគាំទ្រដល់ក្រុមឧទ្ទាម M23 (ចលនា២៣ ខែមីនា) និងដកខ្លួនចេញពីប្រទេសកុងហ្គោ។

ក្រុមឧទ្ទាម M23 បានកាន់កាប់ផ្នែកខ្លះនៃទីក្រុងហ្គោម៉ា ដែលជាទីក្រុងធំបំផុតនៃភាគខាងកើតប្រទេសកុងហ្គោ ខណៈដែលប្រទេសរវ៉ាន់ដាបានបដិសេធការចោទប្រកាន់ថា កងទ័ពរបស់ខ្លួនស្ថិតនៅក្នុងប្រទេសកុងហ្គោដោយគាំទ្រក្រុម M23 ។

អ្នកនាំពាក្យរូបនេះបានបន្ថែមថា ក្នុងអំឡុងពេលសន្ទនាតាមទូរស័ព្ទជាមួយប្រធានាធិបតីរវ៉ាន់ដា លោក ពូល កាហ្គាម (Paul Kagame) លោក ហ្គូធឺរេស បានសង្កត់ធ្ងន់លើតម្រូវការដើម្បីការពារជនស៊ីវិលក្នុងការប្រយុទ្ធនៅប្រទេសកុងហ្គោ។

នៅក្នុងសេចក្តីថ្លែងការណ៍មួយបានចេញផ្សាយថា ប្រធានអង្គការសហប្រជាជាតិបាននិយាយថា លោកមានការព្រួយបារម្ភយ៉ាងខ្លាំងចំពោះការកើនឡើងនៃអំពើហិង្សានៅភាគខាងកើតប្រទេសកុងហ្គោ ហើយលោកបានរំលឹកឡើងវិញនូវការថ្កោលទោសយ៉ាងខ្លាំងបំផុតចំពោះការវាយប្រហារដែលកំពុងបន្តរបស់ក្រុម M23 និងការឈានឆ្ពោះទៅកាន់ទីក្រុងហ្គោម៉ា។ លោកបានអំពាវនាវឱ្យក្រុម M23 បញ្ឈប់ជាបន្ទាន់រាល់សកម្មភាពអរិភាពទាំងអស់ ហើយដកខ្លួនចេញពីតំបន់កាន់កាប់៕

ដោយ៖ មូល មិនា (ប្រភព៖ ភីបផលដេលី)