AKP ភ្នំពេញ ថ្ងៃទី៣០ ខែមករា ឆ្នាំ២០២៥ -- វិមានក្រឹមឡាំងចាត់ទុកទំនាក់ទំនងចុងក្រោយបង្អស់រវាងគណៈប្រតិភូរុស្ស៊ី និងរដ្ឋបាលថ្មីរបស់ស៊ីរី ថាមានសារៈសំខាន់ ហើយកិច្ចសន្ទនានេះនឹងបន្តទៅមុខ។ នេះបើយោងតាមអ្នកនាំពាក្យវិមានក្រឹមឡាំង លោក ឌីមីទ្រី ប៉េសកូវ (Dmitry Peskov) បានប្រាប់អ្នកសារព័ត៌មាន។

លោក ប៉េសកូវ បាននិយាយដោយអត្ថាធិប្បាយនៅក្នុងដំណើរទស្សនកិច្ចកាលពីថ្ងៃអង្គារទៅកាន់ទីក្រុងដាម៉ាស់របស់ក្រុមមន្ត្រីរុស្ស៊ីថា «នោះគឺជាដំណើរទស្សនកិច្ចដ៏សំខាន់មួយ ហើយទំនាក់ទំនងក៏សំខាន់ដែរ ព្រោះវាជាការចាំបាច់ដើម្បីបង្កើត និងរក្សាកិច្ចសន្ទនាថេរជាមួយប្រទេសស៊ីរី»។

កាល​ពី​ថ្ងៃ​អង្គារ គណៈប្រតិភូ​អន្តរក្រសួង​រុស្ស៊ី​បាន​ជួប​ពិភាក្សា​គ្នា​នៅ​ក្រុង​ដាម៉ាស់​ជាមួយ​ប្រមុខ​រដ្ឋបាលថ្មីរបស់​ស៊ីរី​។ លោក មីឃែល បូកដាណូវ (Mikhail Bogdanov) បេសកជនពិសេសប្រធានាធិបតីប្រចាំតំបន់មជ្ឈិមបូព៌ា និងអាហ្វ្រិក ដែលដឹកនាំគណៈប្រតិភូនោះបានពណ៌នាចំពោះកិច្ចប្រជុំដែលមានរយៈពេលជិតបីម៉ោងនោះថាជាកិច្ចប្រជុំមួយប្រកបដោយការស្ថាបនា។ អ្នកការទូតជាន់ខ្ពស់រុស្ស៊ីបានសង្កត់ធ្ងន់ថា ទីក្រុងម៉ូស្គូនៅតែបន្តគាំទ្របូរណភាពទឹកដី និងអធិបតេយ្យភាពរបស់ប្រទេសស៊ីរី។ យោងតាមរូបលោក បានឱ្យដឹងថា គណៈប្រតិភូរុស្ស៊ីបាននិយាយនៅឯកិច្ចចរចារនោះថា បញ្ហាប្រឈមនឹងសាធារណរដ្ឋអារ៉ាប់ ចាំបាច់ត្រូវដោះស្រាយតាមរយៈកិច្ចសន្ទនារួមមួយដែលពាក់ព័ន្ធនឹងកម្លាំងនយោបាយទាំងអស់ ក៏ដូចជាក្រុមជនជាតិភាគតិច និងសាសនាទាំងអស់។

លោក បូកដាណូវ បានបង្ហាញឱ្យដឹងថា ក្នុងចំណោមរឿងផ្សេងៗទៀត ភាគីទាំងពីរបានពិភាក្សាអំពីបញ្ហានៃការរក្សាមូលដ្ឋានយោធារុស្ស៊ីនៅក្នុងប្រទេសស៊ីរី។ លោក​បាននិយាយ​បន្ថែម​ថា ពួក​គេ​បាន​ព្រមព្រៀង​បន្ត​កិច្ច​ពិគ្រោះ​យោបល់​ទៅលើ​បញ្ហា​នេះ។ ទន្ទឹម​នឹង​នេះដែរ វត្តមាន​យោធា​រុស្ស៊ី​នៅ​ស៊ីរី​នៅ​តែ​មិន​ប្រែប្រួល៕

ដោយ៖ យា ចិន្ដាខន្ដី (ប្រភព៖ តាសស៍)