AKP ភ្នំពេញ ថ្ងៃទី៣០ ខែមករា ឆ្នាំ២០២៥ -- ការខូចខាតផ្នែកសេដ្ឋកិច្ចពីការបាត់បង់ឱកាសដែលបណ្តាលមកពីការបំពុលខ្យល់ដែលលើសពីកម្រិតមធ្យម 100µg/m³ នៅក្នុងសន្ទស្សន៍គុណភាពខ្យល់ (AQI) ក្នុង និងជុំវិញទីក្រុងបាងកកក្នុងរយៈពេលមួយខែ ត្រូវបានគេប៉ាន់ប្រមាណថាប្រហែល ៣ពាន់លានបាត (៨៩,៤លានដុល្លារអាម៉េរិក)។ នេះ​បើ​តាម​ការ​វាយ​តម្លៃ​ដោយ​មជ្ឈមណ្ឌល​ស្រាវជ្រាវកសិករ (Kasikorn) របស់​ប្រទេស​ថៃ (KRC)។

ដូចដែលត្រូវបានរាយការណ៍ដោយសេវាព័ត៌មានភាសាអង់គ្លេសក្នុងស្រុក Thai PBS World បានឱ្យដឹងថា មជ្ឈមណ្ឌលបាននិយាយថា កម្រិតពុល PM2.5 ច្រើនពេកនៅក្នុងបរិយាកាសនាំឱ្យការចំណាយទៅលើការព្យាបាលវេជ្ជសាស្រ្ត និងការបង្កាសម្រាប់ការថែទាំសុខភាព ដូចជារបាំងមុខ និងម៉ាស៊ីនបន្សុទ្ធខ្យល់ជាដើម។ ទោះបីជាការចំណាយបែបនេះមានប្រយោជន៍សម្រាប់អាជីវកម្មក៏ដោយ ក៏វាអាចបង្កើតជាការបាត់បង់ឱកាសសម្រាប់អ្នកប្រើប្រាស់ ដោយសារតែពួកគេអាចប្រើប្រាស់លុយសម្រាប់គោលបំណងផ្សេងទៀត។

ការប៉ាន់ប្រមាណការខូចខាតផ្នែកសេដ្ឋកិច្ច គឺផ្អែកទៅលើការសន្មត់ថា ប្រជាជនប្រហែល ២,៤លាននាក់នៅក្នុងទីក្រុងបាងកកកំពុងទទួលរងនូវជំងឺអាឡែកស៊ី និងជំងឺផ្លូវដង្ហើម ដោយនៅក្នុងនោះ ប្រហែលពាក់កណ្តាលនៃពួកគេត្រូវទៅជួបគ្រូពេទ្យយ៉ាងហោចណាស់ម្តងក្នុងមួយខែ ដោយត្រូវ​ចំណាយទៅ​លើ​ថ្លៃ​ព្យាបាល និង​ការ​ធ្វើ​ដំណើរជាមធ្យមពី ១.៨០០ - ២.០០០បាត​ក្នុង​មនុស្សម្នាក់៕

ដោយ៖ យា ចិន្ដាខន្ដី (ប្រភព៖ VNA)