AKP ភ្នំពេញ ថ្ងៃទី២៩ ខែមករា ឆ្នាំ២០២៥ -- ក្រុមហ៊ុន KazMunayGas ដែលជាក្រុមហ៊ុនប្រេង និងឧស្ម័នជាតិរបស់ប្រទេសកាហ្សាក់ស្ថាន បាននិយាយនៅក្នុងសេចក្តីប្រកាសព័ត៌មានមួយថា នាវាតារេហ្ស (Taraz)របស់ប្រទេសកាហ្សាក់ស្ថាន ដែលដឹកប្រេងពីតំបន់កាសាហ្គាន់បានចាកចេញពីកំពង់ផែអាកទូ ឆ្ពោះទៅកាន់កំពង់ផែបាគូ ប្រទេសអាស៊ែបៃហ្សង់។

ការផ្គត់ផ្គង់កំពុងត្រូវបានអនុវត្តន៍ជាផ្នែកនៃការអនុវត្តសេចក្តីណែនាំដែលចេញដោយប្រធានាធិបតីកាហ្សាក់ស្ថាន លោក កាស៊ីម ចូម៉ាត តូកេវ (Kassym-Jomart Tokaev) ដើម្បីបង្កើតផ្លូវនាំចេញជំនួសការនាំចេញអ៊ីដ្រូកាបូនក្នុងស្រុក។

ប្រេងនឹងត្រូវដឹកជញ្ជូនតាមប្រព័ន្ធបំពង់បាគូ-ប៊ីលីស៊ី-សេយហាន់(Baku-Tbilisi-Ceyhan) (BTC) ដែលនឹងដឹកជញ្ជូនតាមផ្លូវទៅកាន់សមុទ្រមេឌីទែរ៉ាណេ។ សកម្មភាពយុទ្ធសាស្ត្រនេះមានគោលបំណងពង្រឹង និងអភិវឌ្ឍផ្លូវដឹកជញ្ជូនអន្តរជាតិឆ្លងកាត់សមុទ្រកាសព្យែនដែលត្រូវបានគេស្គាល់ផងដែរថាជាច្រករបៀងកណ្តាល។

នៅឆ្នាំ២០២២ កិច្ចព្រមព្រៀងក្របខ័ណ្ឌមួយត្រូវបានចុះហត្ថលេខារវាងក្រុមហ៊ុន KazMunayGas របស់ប្រទេសកាហ្សាក់ស្ថាន និងក្រុមហ៊ុនប្រេងរដ្ឋរបស់ប្រទេសអាស៊ែបៃហ្សង់ (SOCAR) ទាក់ទងនឹងការដឹកជញ្ជូនប្រេងរបស់ប្រទេសកាហ្សាក់ស្ថាន។

ភាគីទាំងពីរបានចុះហត្ថលេខាលើកិច្ចព្រមព្រៀងមួយដើម្បីបង្កើនបរិមាណដឹកជញ្ជូនប្រេងជាបណ្តើរៗតាមរយៈប្រទេសអាស៊ែបៃហ្សង់ក្នុងខែមីនា ឆ្នាំ២០២៤។ ក្រោមកិច្ចព្រមព្រៀងនេះ បរិមាណចែកចាយប្រេងប្រចាំឆ្នាំត្រូវបានគេរំពឹងថានឹងឈានដល់ ២,២លានតោន។

តំបន់កាសាហ្គាន់ គឺជាតំបន់ប្រេង និងឧស្ម័នដ៏ធំបំផុតនៅក្នុងតំបន់កាហ្សាក់ហ៍ នៃសមុទ្រសមុទ្រកាសព្យែន។ នៅខែវិច្ឆិកា ឆ្នាំ២០២៤ អណ្តូងប្រេងតំបន់កាសាហ្គាន់បានដំណើរការឡើងវិញនូវសមត្ថភាពពេញលេញបន្ទាប់ពីការបិទអស់រយៈពេលមួយខែសម្រាប់ការថែទាំសំខាន់ៗ៕

ដោយ៖ មូល មិនា (ប្រភព៖ ស៊ីនហួ)