AKP ភ្នំពេញ ថ្ងៃទី២៩ ខែមករា ឆ្នាំ២០២៥ -- លោកស្រី កាចា កាល់ឡាស (Kaja Kallas) តំណាងជាន់ខ្ពស់សម្រាប់ប្លុកនៃកិច្ចការបរទេស និងគោលនយោបាយសន្តិសុខ បាននិយាយថា សហភាពអឺរ៉ុប (EU) បានយល់ព្រមចាប់ផ្តើមបន្ធូរបន្ថយទណ្ឌកម្មលើប្រទេសស៊ីរី។

ថ្លែងទៅកាន់អ្នកសារព័ត៌មានបន្ទាប់ពីកិច្ចប្រជុំមួយផ្តោតលើបញ្ហាភូមិសាស្ត្រនយោបាយ លោកស្រី កាល់ឡាស បាននិយាយថា សហភាពអឺរ៉ុបគ្រោងនឹងដកទណ្ឌកម្មជាលើកដំបូងលើប្រទេសស៊ីរី ដែលរារាំងដល់ការកសាងប្រទេសឡើងវិញដំបូងបំផុត ខណៈដែលទណ្ឌកម្មទាក់ទងនឹងការជួញដូរអាវុធនឹងនៅតែមាន។

លោកស្រី កាល់ឡាស ក៏បានបញ្ជាក់សារជាថ្មីអំពីការគាំទ្ររបស់សហភាពអឺរ៉ុបសម្រាប់ដំណោះស្រាយរដ្ឋពីរនៅប៉ាឡេស្ទីន ដោយឆ្លើយតបទៅនឹងការលើកឡើងរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ក្នុងការផ្លាស់ទីលំនៅប្រជាជនប៉ាឡេស្ទីនទៅកាន់ប្រទេសផ្សេងទៀត។ លោក​ស្រី​បាន​សង្កត់​ធ្ងន់​ថា ការ​សម្រេច​បាន​សន្តិភាព​តម្រូវ​ឱ្យ​មាន​ការ​ឈរ​ជើង​ស្មើ​គ្នា​សម្រាប់​រដ្ឋ​ទាំង​ពីរ។

លោកស្រី កាល់ឡាស បាននិយាយថា បេសកកម្មជំនួយព្រំដែនរបស់សហភាពអឺរ៉ុបសម្រាប់ការឆ្លងកាត់ទីក្រុងរ៉ាហ្វាហ៍នឹងបន្តនៅក្នុងខែកុម្ភៈដោយត្រួតពិនិត្យព្រំដែនតំបន់ហ្គាហ្សា-អេហ្សីប ដើម្បីគាំទ្របទឈប់បាញ់លោកស្រីបានបន្ថែមថា បេសកកម្មនេះត្រូវបានគាំទ្រដោយប៉ាឡេស្ទីនអ៊ីស្រាអែល និងអេហ្ស៊ីប។

នៅក្នុងតំបន់ហ្គ្រីនលេន ដែលជាប្រធានបទលើកឡើងដោយលោក ត្រាំ លោកស្រី កាល់ឡាស បានសង្កត់ធ្ងន់លើការរួបរួមរបស់សហភាពអឺរ៉ុបនិងសារៈសំខាន់នៃការពង្រឹងគោលនយោបាយរបស់សហភាពអឺរ៉ុប ជំនួសឱ្យការដែលគ្រាន់តែប្រតិកម្មចំពោះសកម្មភាពរបស់សហរដ្ឋអាមេរិក៕

ដោយ៖ មូល មិនា (ប្រភព៖ ភីបផលដេលី)