AKP ភ្នំពេញ ថ្ងៃទី២១ ខែមករា ឆ្នាំ២០២៥ -- ប្រភពពីឧស្សាហកម្ម និងរដ្ឋាភិបាលបាននិយាយកាលពីថ្ងៃចន្ទថា ប្រទេសកូរ៉េខាងត្បូងកំពុងស្ថិតក្នុងដំណាក់កាលចុងក្រោយនៃការឈានដល់កិច្ចព្រមព្រៀងតម្លៃ ៣០០លានដុល្លារអាម៉េរិកក្នុងការនាំចេញរថក្រោះ K9 ទៅកាន់ប្រទេសវៀតណាម។

យោងតាមប្រភពបានឱ្យដឹងថា នៅក្រោមផែនការដែលរំពឹងទុកប្រទេសកូរ៉េខាងត្បូងនឹងបញ្ជូនរថក្រោះ K9 ប្រហែល ២០គ្រឿងទៅកាន់ប្រទេសវៀតណាម ដែលនឹងធ្វើឱ្យទីក្រុងហាណូយក្លាយជាប្រទេសទី១០ ដែលទទួលបានប្រព័ន្ធសព្វាវុធពីទីក្រុងសេអ៊ូល ។ កន្លងមក ប្រទេសកូរ៉េខាងត្បូងបានបញ្ជូនរថក្រោះ K9 ទៅប្រទេសអូស្ត្រាលី អេហ្ស៊ីប អេស្តូនីហ្វាំងឡង់ ឥណ្ឌា ន័រវេស ប៉ូឡូញ រូម៉ានី និងតួកគី។

កិច្ចព្រមព្រៀងដ៏កម្រនេះកើតឡើងនៅពេលដែលប្រទេសវៀតណាមដែលជាដៃគូពាណិជ្ជកម្មធំទី៣ របស់ប្រទេសកូរ៉េខាងត្បូង ស្វែងរកការធ្វើពិពិធកម្មការផ្គត់ផ្គង់អាវុធរបស់ខ្លួន ចំពេលមានការផ្លាស់ប្តូរនៅក្នុងស្ថានភាពសន្តិសុខពិភពលោក និងក្នុងតំបន់។ ក្នុងខែវិច្ឆិកា កងទ័ពវៀតណាមបានចូលរួមក្នុងកម្មវិធីបណ្តុះបណ្តាលរថក្រោះ K9 សម្រាប់កងទ័ពបរទេសដែលរៀបចំដោយកងទ័ពកូរ៉េខាងត្បូង។

ក្នុងដំណើរទៅកាន់ប្រទេសកូរ៉េខាងត្បូងក្នុងឆ្នាំ២០២៣ រដ្ឋមន្ត្រីក្រសួងការពារជាតិវៀតណាម លោក ផាន វ៉ាន់ហ្គាង (Phan Van Giang)បានទៅទស្សនាអង្គភាពកងទ័ពកូរ៉េខាងត្បូង ដែលប្រតិបត្តិការរថក្រោះ K9 និងត្រូវបានផ្តល់ព័ត៌មានសង្ខេបអំពីប្រព័ន្ធអាវុធដោយក្រុមហ៊ុនផលិតយន្តហោះ Hanwha Aerospace ៕

ដោយ៖ មូល មិនា (ប្រភព៖ យ៉ុនហាប់)