AKP ភ្នំពេញ ថ្ងៃទី២១ ខែមករា ឆ្នាំ២០២៥ -- ប្រភពពីប៉ាឡេស្ទីនបានបញ្ជាក់ថា ឡានជំនួយមនុស្សធម៌ដំបូងបានចូលដល់តំបន់ហ្គាហ្សាពីប្រទេសអេហ្ស៊ីប ខណៈដែលបទឈប់បាញ់អ៊ីស្រាអែល និងក្រុមហាម៉ាស់បានចាប់ផ្តើមចូលជាធរមាន។ ប្រភពបានសារព័ត៌មានស៊ីនហួថា ជំនួយមនុស្សធម៌ដំបូងបានចូលទៅក្នុងតំបន់មាត់សមុទ្រតាមរយៈច្រកព្រំដែន Kerem Shalom នៅភាគខាងត្បូងនៃតំបន់ហ្គាហ្សា។

នៅព្រឹកថ្ងៃដដែល ទូរទស្សន៍ Nile ដែលគ្រប់គ្រងដោយរដ្ឋអេហ្ស៊ីបបានបង្ហាញវីដេអូនៃរថយន្តជំនួយរាប់សិបគ្រឿង ឆ្លងកាត់ទីក្រុងរ៉ាហ្វាហ៍ប្រទេសអេហ្ស៊ីប ដែលត្រូវត្រួតពិនិត្យដោយអាជ្ញាធរអ៊ីស្រាអែលមុនពេលឆ្លងកាត់ភាគីប៉ាឡេស្ទីនដើម្បីចូលទៅកាន់តំបន់ហ្គាហ្សា។

គណៈប្រតិភូជាអ្នកសម្រុះសម្រួលកាតា និងសហរដ្ឋអាមេរិក បន្ថែមពីលើអ្នកផ្សេងទៀតមកពីប៉ាឡេស្ទីន និងអ៊ីស្រាអែល បានមកដល់ទីក្រុងគែរដើម្បីត្រួតពិនិត្យការអនុវត្តកិច្ចព្រមព្រៀងបទឈប់បាញ់អ៊ីស្រាអែល និងក្រុមហាម៉ាស់។

ដោយផ្អែកលើកិច្ចព្រមព្រៀងឈប់បាញ់ រថយន្តប្រហែល ៦០០គ្រឿងដែលផ្ទុកដោយជំនួយមនុស្សធម៌ រួមទាំងរថយន្តដឹកប្រេងចំនួន ៥០គ្រឿងនឹងចូលទៅក្នុងតំបន់ហ្គាហ្សាជារៀងរាល់ថ្ងៃដើម្បីបន្ធូរបន្ថយវិបត្តិមនុស្សធម៌នៅតំបន់ហ្គាហ្សា។

របាយការណ៍បានកត់សម្គាល់ថា ដំណាក់កាលដំបូងរយៈពេល ៤២ថ្ងៃនៃកិច្ចព្រមព្រៀងបទឈប់បាញ់ដែលបានឈានដល់កាលពីថ្ងៃពុធតាមរយៈការសម្រុះសម្រួលនៃប្រទេសអេហ្ស៊ីប កាតា និងសហរដ្ឋអាមេរិក បានចាប់ផ្តើមចូលជាធរមានកាលពីថ្ងៃអាទិត្យ បន្ទាប់ពីក្រុមហាម៉ាស់បានផ្តល់បញ្ជីឈ្មោះស្ត្រីជនជាតិអ៊ីស្រាអែល ៣នាក់ដែលត្រូវបានចាប់ខ្លួន ហើយដោះលែងនៅពេលក្រោយ។

ជាមួយគ្នានេះដែរ ការិយាល័យរបស់នាយករដ្ឋមន្ត្រីអ៊ីស្រាអែល លោក បេនចាមីន នេតាន់យ៉ាហ៊ូ (Benjamin Netanyahu) បានបញ្ជាក់ថា កិច្ចព្រមព្រៀងឈប់បាញ់បានចាប់ផ្តើមចូលជាធរមាន៕

ដោយ៖ មូល មិនា (ប្រភព៖ ស៊ីនហួ)