AKP ភ្នំពេញ ថ្ងៃទី២១ ខែមករា ឆ្នាំ២០២៥ -- កិច្ចព្រមព្រៀងបទឈប់បាញ់រវាងអ៊ីស្រាអែល និងក្រុមហាម៉ាស់នៅតំបន់ហ្គាហ្សាបានចូលជាធរមានបន្ទាប់ពីការវាយប្រហារដ៏សាហាវជាង ១៥ខែមកនេះ។

នាយករដ្ឋមន្ត្រីអ៊ីស្រាអែល លោក បេនចាមីន នេតាន់យ៉ាហ៊ូ (Benjamin Netanyahu) បានប្រកាសពីការចាប់ផ្តើមនៃបទឈប់បាញ់នៅក្នុងសេចក្តីថ្លែងការណ៍មួយ បន្ទាប់ពីក្រុមហាម៉ាស់បានបញ្ចេញឈ្មោះស្ត្រីចំណាប់ខ្មាំង ៣នាក់ដំបូងដែលនឹងត្រូវដោះលែងនៅពេលក្រោយ។

កិច្ចព្រមព្រៀងឈប់បាញ់ដែលសម្របសម្រួលដោយប្រទេសកាតាអេហ្ស៊ីប និងសហរដ្ឋអាមេរិក គ្រោងនឹងចូលជាធរមាននៅម៉ោង ៨:៣០នាទីព្រឹក ប៉ុន្តែលោក នេតាន់យ៉ាហ៊ូ បានបញ្ជាឱ្យយោធាបន្តការវាយប្រហារដោយប្តេជ្ញាថានឹងមិនបញ្ឈប់ការប្រយុទ្ធរហូតដល់ក្រុមហាម៉ាស់    ផ្តល់បញ្ជីចំណាប់ខ្មាំង។

នៅក្នុងសេចក្តីថ្លែងការណ៍មួយ ក្រុមហាម៉ាស់បានអះអាងជាថ្មីនូវការប្តេជ្ញាចិត្តរបស់ខ្លួនចំពោះកិច្ចព្រមព្រៀងនេះ ប៉ុន្តែក្រុមនេះបាននិយាយថាការពន្យារពេលនៃការផ្តល់បញ្ជីនេះគឺដោយសារតែហេតុផលបច្ចេកទេស។

ទន្ទឹមនឹងនេះ យោធាអ៊ីស្រាអែលបាននិយាយថា ខ្លួនបានធ្វើការវាយប្រហារដោយកាំភ្លើងធំ និងតាមអាកាសនៅក្នុងទីតាំងជាច្រើននៅទូទាំងតំបន់ហ្គាហ្សា។ អាជ្ញាធរ​សុខាភិបាល​ប៉ាឡេស្ទីន​បាន​រាយការណ៍​ថា មនុស្ស​យ៉ាង​ហោច​ណាស់ ៨នាក់​ត្រូវ​បាន​សម្លាប់​ក្នុង​ការ​វាយ​ប្រហារ៕

ដោយ៖ មូល មិនា (ប្រភព៖ ភីបផលដេលី)