AKP ភ្នំពេញ ថ្ងៃទី២០ ខែមករា ឆ្នាំ២០២៥ -- ប្រធានាធិបតី​ចិន លោក ស៊ី ជីនពីង (Xi Jinping) ​បាន​ផ្ញើ​សារ​អបអរសាទរ​ដល់ ​លោក ហ្សូរ៉ាន់ មីឡាណូវីក (Zoran Milanovic) ក្នុង​ការ​ជាប់​ឆ្នោត​ជា​ប្រធានាធិបតី​ក្រូអាត​ឡើង​វិញ។

នៅក្នុងសារនោះ លោក ស៊ី បាននិយាយថា ប្រទេសចិន និងក្រូអាតមានទំនាក់ទំនងមិត្តភាពជាប្រពៃណីដ៏ជ្រាលជ្រៅ ហើយប្រទេសទាំងពីរគឺជាមិត្តល្អ និងជាដៃគូដ៏ល្អនៃការគោរព និងការជឿទុកចិត្តគ្នាទៅវិញទៅមក។

លោកបាននិយាយថា ក្នុងប៉ុន្មានឆ្នាំចុងក្រោយនេះ ភាគីទាំងពីរបានអនុវត្តន៍កិច្ចសហប្រតិបត្តិការខ្សែក្រវ៉ាត់ និងផ្លូវប្រកបដោយគុណភាពខ្ពស់និងជំរុញកិច្ចសហប្រតិបត្តិការលើវិស័យផ្សេងៗដោយបើកចំហ ទទួលបានផលប្រយោជន៍ទៅវិញទៅមក និងលទ្ធផលឈ្នះ-ឈ្នះ ដែលបង្ហាញពីភាពរឹងមាំនៃទំនាក់ទំនងទ្វេភាគី។

លោក ស៊ី បាននិយាយថា លោកយកចិត្តទុកដាក់យ៉ាងខ្លាំងចំពោះការអភិវឌ្ឍទំនាក់ទំនងចិន-ក្រូអាត ហើយត្រៀមខ្លួនជាស្រេចដើម្បីធ្វើការជាមួយលោក មីឡាណូវីក ដើម្បីជំរុញប្រទេសទាំងពីរឱ្យឈានទៅមុខលើវិស័យទំនើបកម្ម ហើយមានទំនាក់ទំនងភាពជាដៃគូសហប្រតិបត្តិការដ៏ទូលំទូលាយចិន-ក្រូអាត៕

ដោយ៖ មូល មិនា (ប្រភព៖ ភីបផលដេលី)