AKP ភ្នំពេញ ថ្ងៃទី១៧ ខែមករា ឆ្នាំ២០២៥ -- ប្រធានាធិបតីចិន លោក ស៊ី ជីនពីង (Xi Jinping) បាននិយាយថា ប្រទេសចិននឹងគាំទ្រយ៉ាងសកម្មដល់ស្រីលង្កាក្នុងការផ្តោតលើការអភិវឌ្ឍសេដ្ឋកិច្ច ហើយប្រទេសទាំងពីរគួរតែរួមគ្នាជំរុញកិច្ចសហប្រតិបត្តិការខ្សែក្រវ៉ាត់ និងផ្លូវដែលមានគុណភាពខ្ពស់ ក៏ដូចជាកិច្ចសហប្រតិបត្តិការក្នុងវិស័យកសិកម្មទំនើប សេដ្ឋកិច្ចឌីជីថល និងសេដ្ឋកិច្ចសមុទ្រ។

លោក ស៊ី បាននិយាយនៅពេលកំពុងជួបពិភាក្សាជាមួយប្រធានាធិបតីស្រីលង្កា លោក អានូរ៉ា គូម៉ារ៉ា ឌីសសាណាយ៉ាកេ (Anura Kumara Dissanayake) ដែលកំពុងបំពេញទស្សនកិច្ចផ្លូវរដ្ឋនៅក្នុងប្រទេសចិនថា កិច្ចខិតខំប្រឹងប្រែងរបស់ប្រទេសចិនក្នុងការធ្វើឱ្យស៊ីជម្រៅបន្ថែមទៀតនូវកំណែទម្រង់យ៉ាងទូលំទូលាយ ដើម្បីជំរុញទំនើបកម្មរបស់ប្រទេសចិនសម្រាប់ការអភិវឌ្ឍរបស់ប្រទេសស្រីលង្កា។

ដោយកត់សំគាល់ថា ប្រទេសចិន និងស្រីលង្កា មានទំនាក់ទំនងមិត្តភាពជាប្រពៃណី លោក ស៊ី បាននិយាយថា ទំនាក់ទំនងទ្វេភាគីបានរក្សាបាននូវការអភិវឌ្ឍប្រកបដោយគុណភាព  និងស្ថិរភាពក្នុងរយៈពេល ៦៨ឆ្នាំកន្លងមកនេះ ប្រកបដោយមិត្តភាព និងកិច្ចសហប្រតិបត្តិការដែលមានផលប្រយោជន៍ទៅវិញទៅមករវាងប្រទេសផ្សេងៗគ្នា។

លោក ស៊ី បាននិយាយថា ប្រទេសចិនគាំទ្រប្រទេសស្រីលង្កាក្នុងការស្វែងរកផ្លូវអភិវឌ្ឍន៍ដែលសមស្របនឹងលក្ខខណ្ឌជាតិរបស់ខ្លួន ហើយមានឆន្ទៈក្នុងការធ្វើឱ្យស៊ីជម្រៅនូវទំនុកចិត្តគ្នាទៅវិញទៅមកផ្នែកនយោបាយ ផ្លាស់ប្តូរបទពិសោធន៍អភិបាលកិច្ច និងបង្កើនកិច្ចសន្ទនា និងការប្រាស្រ័យទាក់ទងរវាងនាយកដ្ឋានផ្សេងៗនៃប្រទេសទាំងពីរ។

ដោយកត់សម្គាល់ថា ប្រទេសស្រីលង្កាកោតសរសើរសមិទ្ធិផលនៃការអភិវឌ្ឍដ៏អស្ចារ្យរបស់ប្រទេសចិនក្នុងវិស័យសេដ្ឋកិច្ច វិទ្យាសាស្ត្រ និងបច្ចេកវិទ្យា និងហេដ្ឋារចនាសម្ព័ន្ធ លោក    ឌីសសាណាយ៉ាកេ បាននិយាយថា ប្រទេសចិនតែងតែជាមិត្ត និងដៃគូដែលអាចទុកចិត្តបានរបស់ប្រទេសស្រីលង្កា ហើយប្រទេសស្រីលង្កាយកចិត្តទុកដាក់យ៉ាងខ្លាំងចំពោះទំនាក់ទំនងរបស់ខ្លួនជាមួយប្រទេសចិន។

ប្រទេសស្រីលង្កាគោរពយ៉ាងខ្ជាប់ខ្ជួននូវគោលការណ៍ចិនតែមួយ ហើយកោតសរសើរចំពោះការគាំទ្ររបស់ប្រទេសចិនក្នុងការការពារឯករាជ្យ អធិបតេយ្យភាព សិទ្ធិ និងផលប្រយោជន៍ស្របច្បាប់របស់ប្រទេសស្រីលង្កា៕

ដោយ៖ មូល មិនា (ប្រភព៖ ភីបផលដេលី)