AKP ភ្នំពេញ ថ្ងៃទី១៦ ខែមករា ឆ្នាំ២០២៥ -- រដ្ឋមន្ត្រីការបរទេសហ្ស៊កដានី លោក អាយម៉ាន់ សាហ្វាឌី (Ayman Safadi) បានសង្កត់ធ្ងន់លើមុខតំណែងរវាងប្រទេសហ្ស៊កដានី និងដាណឺម៉ាក      ក្នុងការគាំទ្រកិច្ចខិតខំប្រឹងប្រែងដើម្បីសម្រេចបាននូវកិច្ចព្រមព្រៀងដែលនឹងនាំឱ្យមានការបញ្ឈប់ «ការឈ្លានពានលើតំបន់ហ្គាហ្សា» ។

យោងតាមសេចក្តីថ្លែងការណ៍របស់ក្រសួង បានឱ្យដឹងថា លោកបានធ្វើការកត់សម្គាល់នៅក្នុងសន្និសីទសារព័ត៌មានរួមគ្នានៅទីក្រុងអាមម៉ាន់ បន្ទាប់ពីកិច្ចប្រជុំជាមួយរដ្ឋមន្ត្រីការបរទេសដាណឺម៉ាក លោក ឡាស លូកកេ រ៉ាសមូសសេន (Lars Lokke Rasmussen)។

លោក សាហ្វាឌី បាននិយាយថា កិច្ចខិតខំប្រឹងប្រែងនាពេលបច្ចុប្បន្នគួរតែនាំទៅរកកិច្ចព្រមព្រៀងដែលផ្តល់នូវតម្រូវការទាំងអស់ ដើម្បីដោះស្រាយគ្រោះមហន្តរាយមនុស្សធម៌ដែលបណ្តាលមកពីជម្លោះដោយបញ្ជូនជំនួយគ្រប់គ្រាន់ ជាក់ស្តែង រហ័ស និងជាបន្ទាន់ទៅកាន់តំបន់ហ្គាហ្សា។

លោករដ្ឋមន្ត្រីបានសង្កត់ធ្ងន់អំពីសារៈសំខាន់នៃការធានាសិទ្ធិរបស់ប៉ាឡេស្ទីនក្នុងការទទួលបានរដ្ឋឯករាជ្យមួយដែលមានអធិបតេយ្យភាពលើព្រំដែនឆ្នាំ១៩៦៧ រួមទាំងទីក្រុងហ្សេរុយសាឡឹមជារដ្ឋធានីរបស់ខ្លួនដោយផ្អែកលើដំណោះស្រាយរដ្ឋពីរ។

សេចក្តីថ្លែងការណ៍បាននិយាយថា កិច្ចពិភាក្សារបស់រដ្ឋមន្ត្រីទាំងពីរក៏បានគ្របដណ្តប់ស្ថានភាពនៅក្នុងប្រទេសស៊ីរី និងបានឃើញការឯកភាពគ្នារវាងភាគីទាំងពីរលើភាពចាំបាច់នៃការគាំទ្រដំណើរការអន្តរកាលដ៏ទូលំទូលាយនៅក្នុងប្រទេសស៊ីរី ដែលនាំទៅដល់ការកសាងឡើងវិញនូវប្រទេសស៊ីរីសេរី អធិបតេយ្យភាព និងឯករាជ្យ ដែលប្រជាជនស៊ីរីទាំងអស់អាចរស់នៅបានដោយសន្តិសុខ ស្ថិរភាព និងទទួលបានសិទ្ធិពេញលេញរបស់ពួកគេ។

លោក រ៉ាសមូសសេន បាននិយាយថា «ប្រទេសហ្ស៊កដានីនឹងនៅតែជាដៃគូស្ថិរភាព និងជាបន្ទាយដ៏រឹងមាំក្នុងតំបន់» ដោយលោកបានសម្តែងការគាំទ្រសម្រាប់ប្រទេសស៊ីរីក្នុងដំណើរការអន្តរកាលរបស់ខ្លួន។

លោក រ៉ាសមូសសេន បានគូសបញ្ជាក់ពីការអំពាវនាវរបស់ប្រទេសដាណឺម៉ាកសម្រាប់បទឈប់បាញ់នៅតំបន់ហ្គាហ្សា ដោយលោកបានបង្ហាញពីក្តីសង្ឃឹមសម្រាប់កិច្ចព្រមព្រៀងភ្លាមៗប្រកបដោយនិរន្តរភាពដែលនឹងជួយសម្រួលដល់ការបង្កើនលទ្ធភាពទទួលបានជំនួយមនុស្សធម៌៕

ដោយ៖ មូល មិនា (ប្រភព៖ ស៊ីនហួ)